Vawiin khan I&PR Auditorium CHANEM Building, Champhaiah AH&Vety Department buatsaihin Vawk pul hri natna chi khat ‘African Swine Fever’  chungchang zirhona leh inrawnkhawmna hun hman a ni.

He hun hmanpuitu Dr. Saihlira, Addl Director, AH&Vety Department chuan African Swine Fever chu vawk pul hri hlauhawm tak a vei za a zain an thihpui theih natna a nih thu a sawi a. He natna thlentu chu DNA Virus Asfivirus niin, Vawk leh Sanghal chi ten an vei thin a, mihringin he natna kaichhawn ve theih ani lo ani, a ti a. Dr Saihlirs chuan African Swine Fever natna chu Kum 1921-ah Africa a hmuh chhuah anih hnuah Kum 2018 khan Chinaah hmuh chhuah leh niin a darh zel tur ven nan   Vawk maktaduai 200 chuang   suat an ngaih  thu a sawi a.  Kumin kum tir khan kan ram hnaih tak tak Vietnam, Cambodia leh a chhehvelahte he Vawk natna hi hmuh chhuah leh a nih tawh thu a sawi a.  Mizoramin vawk kan lakluhna ber pakhat Myanmar ramah he natna hi lut thei reng a nih tawh avangin fimkhur angai a, Myanmar-ah hian a lut a nih chuan rei loteah Mizoram lo thleng mai thei a nih thu a sawi a. AH&Vety Addl Director chuan  African Swine Fever chu a tihdamna damdawi awm lo leh Vaccine la awm lo a nih avangin kan inven theih dan awm chhun chu ram dang atanga Vawk leh Vawksa atanga siam reng renngte lakluh loh a nih thu a sawi bawk.

He Awareness Campaign hi Dr. K Lalrohlua, Dy. Director (Disease Investigation) chuan kaihhruaiin, Vawk pul hri laka himna tha ber chu inven a nih thu a sawi a.  Vawk pul hri natna hlauhawm takin kan ram a lo thlen lohna tura kan tih theih hmasa ber chu fimkhur taka lo invenlawk hi ani tiin, “Ran vulhte an thih avanga sum tamtak leh hun tamtak kan seng thin hi a pawi a, chutiang a thlen lohna tur chuan   theih tawka lo inven hi a ngai a ni" a ti a.  Ram dang atanga Vawk leh vawksa atanga siam lak luhin natna a rawn thlen theih avangin Vawkah kan intodelh a ngai a ni, a ti bawk.

Thusawitu dang Pu C. Lalsawta, SDPO Champhai  pawhin   VC, YMA leh Vawk hmanga eizawngtute  tanrual angaih thu sawiin,  Sawrkarin Vawk lakluh a khap chungchangah khap a nih chhung chu Vawk la lut rih lo tur leh a ven kawnga tawiawmna a ngen a. Dan leh thupek ken kawh kawnga hmalakpui turin khawtlang hruaitute a sawm bawk a ni.

Awareness Campaign-ah hian he natna lanchhuah dan leh inven dan kalkhawmte zirtir an ni a,  Champhai khawpui chhunga VC, YMA leh Vawk hmanga eizawngtute kohkhawm an ni a. Naktuk hian Hnahlan leh Khawbungah Awareness campaign hi neih chhunzawm leh a ni ang. He hun hi Dr. M Zohmingthangi, DVO Champhai chuan lawmthu sawiin a khar a ni.