No.4000/2020-2021

Dated Champhai, the 11th August, 2020 (Tuesday): Tun thla August Ni 27, 2020 a Village Council inthlanna neih tur atana inpuahchahnate thlirin District Election Officer Pi Maria C.T Zuali hovin vawiin khan Champhai DC Conference Hall-ah meeting neih a ni.

He hun kaihruaitu District Election Officer Pi Maria C.T Zuali chuan Covid-19 hrileng vangin harsatna leh buainate thleng mahse tun dinhmunah Village Council inthlan chu hun ruatah kaltlangpui tum a nih thu a sawi a. Inthlanna felfai leh dik tak neih anih theihna turin Champhai district chu a inpuahchah chhoh mek zel thu sawiin, Champhai district chhunga inthlanna neih tur inpuahchahna leh hmalaknate endiktu General Observer tura ruat Pi Zosangzuali Pachuau, MCS pawhin vawiin hian Champhai a lo thlen dawn thu a sawi a. Model Code of Conduct puan anih tawh avangin sawrkar hna kal lai mek pawisa pekchhuah tawh tih loh chu engmah khawih a rem tawh loh thu sawiin, inthlan buaipui kawngah Covid-19 inkaihhruainate chu ngaihpawimawh zual a ni, a ti a. Inthlanna felfai, awn lam bik neilo leh entawntlak tak neih anih theihna turin Sectoral Magistrate-te mahni bial theuh ngun taka vila, dan leh thupek kenkawh leh Model Code of Conduct bawhchhiat theihnate vil uluk zual turin a chah a. Nodal Officer, Returning Officer, Presiding Officer, Polling Officer-te leh chanvo pek hrang hrangte chu mahni mawhphurhna theuhte tha taka hlen chhuah tum turin a chah a ni.

He hunah hian Pu C.Lalengliana, Addl SP Champhai hnen atangin inthlanna neih tura venhimna kalpui dan tur chungchanga ruahmanna neihte ngaihthlak niin, Polling Booth hrang hranga Duty tur Police-te tun dinhmunah an indaih theih tur thu leh Polling Station ven uluk zual bik ngai Vulnerable/ Critical Polling Station a awm loh thu a sawi a. Pu Lalnunfela Chawngthu, Addl. District Election Officer chuan Model Code of Conduct chungchang leh Sectoral Magistrate-te mawhphurhna a sawifiah bawk a ni.

Champhai District chhungah hian Village Council seat 282 a awm a, heng zinga 208 hi General seat niin, 74 dangte chu hmeichhiate tana hauh reserved seat a ni a, Village Council seat 3 nei hi 26 awmin, seat 5 nei 24 leh seat 7 nei 12 an awm a ni. Polling Station 62 ah Polling Booth 71 leh Voting Compartment 104 siam tum niin, Polling Station 9 (Bethel, Farkawn, Hnahlan, Kahrawt, Kanan, Venglai, Vengsang, Vengthlang, Zotlang ‘E’) ah te Polling Booth 2 theuh siam tum ani a, a bak zawngah Polling Booth 1 theuh a awm ang. Inthlannna buaipui tur hian Returning Officer 62, Presiding Officer 71 leh Polling Officer 128 te ruat niin, Counting table 191 siam tuma ruahman a ni bawk.

Village Council inthlanna tura Electoral Roll thar ber tlangzarh takin a tarlan dan chuan Champhai district chhungah vote nei mi 50,452 an awm a, heng zinga 24,621 hi mipa niin 25,831 te hmeichhia an ni a, hmeichhia vote nei hi mipa aiin 1,210 in an tam a ni. VC malah Vengthlang VC huamchhungah vote nei tam berin mi 2,436 an awm a, New Hruaikawn VC huamchhungah vote nei mi 113 awmin a tlem ber a ni.

He hunah hian inthlanna neih tur atana line department hrang hrangte hmalak tawhnate leh hmabak awm hrang hrangte thlirho niin, vote thlak huna chettlatna hmun tur Polling Station hrang hranga inbiakpawhna, eng, tui, hriselna kawnga mamawh leh a panna kawng chungchangte sawiho a ni bawk.

Vawiin meeting-ah hian Pi Maria C.T Zuali DEO, Pu Mark Lalthanliana Leader, Model Code of Conduct Enforcement Team, Pu Lalnunfela Chawngthu Addl. DEO, Sectoral Magistrate, Nodal Officer leh line department aiawh hotute an tel a ni.