MLA General Election 2018 neih zawh taka vote tla chhiar tur Counting Supervisor leh Counting Assistant te chuan vawiin chawhnu khan vote chhiar chhinna Mock Counting an nei.

Vote chhiar chhinna hi Counting Centre tura buatsaih pathum Observers' Room, General Establishment Room leh District Emergency Operation Centre, DC Office hmunah te neih a ni a. Pu Lalremruata Kullai, Election Officer leh Master Trainer ten zirtirna an pe a. Vawiin hian Counting Supervisor leh Counting Assistant tura ruat 45 ve ve ten EVM  leh VVPAT Vote tlate an chhiar chhin a ni. Vote tla chhiar turte Assembly Constituency duty na tura semrualna chu naktuk tlai dar 6 ah neih ani ang a. Inthlan dawn zing dar 5 ah vote chhiara an thutna tur Dawhkan semrualna neih ani bawk ang.

Vawiin vek khan Vote chhiar  endik tura ruat Micro-Observer 45 te pualin training General Establishment, DC Pisaah neih a ni a. Inthlan endiktu tihtur leh form dahkhah dante zirtirna neih a ni a. District Election Officer leh Election Officer, Champhai ten training an pe a ni.

Vote chhiar ni December Ni 11 , 2018 hian vote chhiar ni a duty tur official tan kalna tur Bus ruahman ani dawn a. Bus te hi Bethel Kawn atangin Bus pakhat leh Vengthlang Dawr Veng atangin Bus pathum a chhuak dawn a, Hospital Road lam atangin Keifangtlang an pan dawn a, kawnglakah a lo chan theih bawk ang. Bus chhuah hmasak hun hi zing dar 6 ani ang a, hetah hian Micro Observers, Counting Supervisor leh Counting Assistant te an chuang phawt ang a. Bus chhuah vawihnihna dar 7 ah Presiding Officer te an chuang ve thung ang. Vote chhiarna hmunah hian motor kenluh a rem dawn loh avangin leh parking remchan zawkna turin Bus a kal hram turin Nodal Officer, Vehicles Management chuan vote chhiar huna duty turte a sawm nghal a ni.

Champhai DC Pisaah Postal Ballot hmanga vote thlak chu la kalpui zel a ni a, Vawiin thlenga vote tla zat chu 975 a ni ta, 21-Lengteng A/C ah 153, 22-Tuichang A/C ah 212, 23-Champhai North A/C ah 262, 24-Champhai South A/C ah 220 leh 25-East Tuipui A/C ah 128 a tla tawh a. Heng bakah ETPBS hmangin Service Voters 12 ten vote an thlak tawh bawk a, 21-Lengteng A/C ah Vote 5, 22-Tuichang A/C ah vote 1, 23-Champhai North A/C ah vote 3 leh 24-Champhai South A/C ah vote 3 te a tla tawh a ni.

Champhai District chunga Assembly Constituency 5 awmah Polling Sation 137 a awm a, EVM a vote tlate chhiarna tur Dawhkan 27, Postal Ballot chhiarna 5 leh VVPAT chhiarna tur 5 a awm dawn a, vote tla zawng zawng chhiar zo tur hian round 27 a ngai dawn a ni.