Irrigation & Water Resources Department bultumin Champhai leh a chhhehvel Irrigation Project hnuaia Water Users’ Association (WUA) meet vawi -1 na chu  vawiin chhun dar 12 khan Dam Dam Hall, Champhai Zotlangah neih a ni a. He hunah hian Finance Minister Pu Lalsawta chu khuallian niin Pu KS Thanga, Irrigation & Water Resources Minister chu khualzahawm a ni.

Pu H.Lalengmawia IAS, Secretary, Irrigation & Water Resources Department kaihhruai programme-ah hian Pu Lalsawta chuan loneitu chu kan ram neih chhun enkawl tura tan la turin a fuih a. Ram tha tak nei chunga tharchhuah a hlawk theilo chu in enfiah a ngai a ni, a ti a.  Kham khawp buh leh bal tharchhuak tura tan lak angaih thu leh loneitute pawhin an kova tla tihturte chu rinawm leh taima taka an thawh angai a; an theih bakah chuan sawrkar pawhin a tih tur chu a ti ve mai dawn a ni, a ti a.  Finance Minister chuan tunlai harsatna lian tak chu pawisa awlsam leh hnathawk lova awm theihna  anih thu a sawi a, hei hian kan nunah thil pawi tak a thlen a ni ,a ti a. Kan nitin nunah  eizawnna leh hnathawh chungchangte hian hun tam zawk luah thin se, chu chuan rah  duhawm a chhuah a rin thu a sawi a,. Mi duham tlemte avanga mi tam zawkin harsatna an tawk thin chu thil thalo tak anih thu a sawi a. Kuthnathawktu hnathawh chak tak takte chuan sawrkar a ti hlima, phurna nasa tak a pek thu leh sawrkar flagship programme NEDP hmangin ti tak takte hnenah tangte puihna pek zel anih tur thu a sawi bawk a. Sawrkar hnathawkten kuthnathawktute tana boruak tha tak hnuaia hna an thawk thin chu fakawm a tih thu a sawi a. Khuallian chuan taima leh rinawm taka ram leh hnam tana thawk zel turin WUA Member-te chu a chah nghal bawk a ni.

Khualzahawm Pu KS Thanga, Irrigation & Water Resources Minister pawhin thu sawiin Agriculture department tihhmasawn nan sawrkarin  nasa takin hna a thawka, Irrigation chu Agriculture dinchhan leh innghahna pawimawh tak a ni, a ti a. Finance Minister-in hun chep tak kara Irrigation department leh kuthnathawktute hnathawh leh harsatnate a hmun ngeia a enfiah sak chu fakawm a tiin a chungah lawmthu a sawi a. Kum 30 chhunga Mizoram Buh  mamawh chanve tharchhuak thei turin JAICA (Japan International Cooperation Agency)  nena thawkhoin project buaipui mek a ni, a ti a. Heng bakah hian Agriculture tihhmasawn nan UNO peng pakhat IFAD (International Fund for Agriculture Development) hmalaknain cheng vaibelchhe 500 vel bawr hmangin District pali: Champhai, Serchhip, Kolasib leh Mamitah hnathawh anih tur thu a sawi a. Kuthnathawktute chawikan chu sawrkar tum ber anih thu a sawi a. Tui hnianghnar zawka hman tur a awm theih nan Irrigation project-te kalpui niin a enkawl zuina lama hmalak zel chu thil tul tak a ni, a  ti a. Leihnuaia tui awmte zirchian tum anih thu leh a theih chin chinah Solar pump hmangte a lakchhuah tum a nih thu a sawi a. Phaizau tuikhuah chu a hmangtu tur loneituten an mamawhna ang zela an hman theih zelna tura hma la zel turin a chah a. Leitha subsidy pek a ni chunga a la to viau chu lo enzui a tum thu leh  awlsam zawka loneituten an neih theihna tura hmalak a tum thu a sawi a.  A huntaka thlai chi an hmuh theihna tura tan lak pui a tum thu a sawi bawk a ni. WUA member-te chu Mizoram Agriculture tun dinna tura an hnathawh chhunzawm zel tura chahin  duhsakna a hlan a ni.

Vawiin programme hi Pu H. Lalengmawia IAS, Secretary, I&WRD-in kaihruaiin kalkhawmte lawmna thu a sawiin. vawiin ni hi Champhai mipuite tana ni lawmawm leh chhinchhiah tlak tak a ni, a ti a. Kuthnathawktute chu sawrkara innghat vek loin an tih theih tawk theuhah taima tak a thawk turin a fuih a. He hunah hian Er Lalrotluanga, Chief Engineer, I&WRD-in technical report a pe a. WUA lam atangin zautin aiawh hnen atangin an hmalak dan, Project an chhawr tangkai dante, tuihna tha tak nei thei tura an hnathawh dante bakah sawrkar lam atanga an mamawhte  thlenna hun an nei nghal bawk a ni.

Irrigation & Water Resources Department hnuaia Minor Irrigation Project zawh tawh zawng zawngah hian tuikawng a tanga tui hmang tangkaitu zawng zawngte tan Water Users Association (WUA) hi din zel a ni a. A tum ber chu tuikawngte uluk taka enkawl, tui insem chungchang relfel leh tangkai leh daihzai taka tui hmante a ni.

Vawiin chawhma lam khan Finance Minister leh Irrigation & Water Resources Minister leh Secretary, I&WRD-te chuan Champhai leh a chhehvela Minor Irrigation Project; Keilungliah, Phaizau leh Saitluangte a hmunah kalin an tlawh a. Heng hmunahte hian loneitute nena inkawmna an neihpui zel a, loneituten project an hman tangkai dan leh an harsatna tawhte an hnenah hian an lo thlen a ni. WUA chuan Minister pahnih uapna hnuaia meet hlawhtling tak buatsaih a ni chu lawmawm a tih thu a sawi a ni.

Water Users Association (WUA) Meet-ah hian I&WR Department official- SE,EE bakah Aizawl leh Kolasib Division EE-te; Sawrkar Official-te leh WUA member-te an tel a ni.