Vawiin khan khawvel hmundangte rualin Champhai District Mental Health Programme leh Mission Foundation Movement tangkawp buatsaihin I&PR Conference Hall, CHANEM-ah World Alzheimer's Day hman a ni a. He hun hi Sub Headquarters YMA, Sub Headquarters MHIP, MUP leh Champhai khaw chhung veng hrang hrang a MUP Unit hruaitute nen hman ho a ni.

Champhaia World Alzheimer's Day lawmna ah hian Dr. Lalnuntluangi Khiangte, District Medical Superintendent, Champhai chuan thusawiin "Alzheimer's natna hi thluak lam natna a ni a, thluak timur leh thazam te a tihchhiat avangin hriatrengna, tawng, ngaihtuahna leh thuthlukna siam kawngah harsatna a awm tir a. Kum 60 hnu lama intan tam ber in, atirah chuan haihawt satliah mai angin a lang chhuak a, tichuan zawi zawiin hriat na a lo tlahniam zel a, a tawpah chuan nitin nun tibuai khawpa hriatna hloh in harsatna a thlen thei a ni.

Alzheimer's natna hi natna lang chhuak muang tak a ni a, kum upa zelin a ken tel ve reng nen a ngaihpawlh awl tak a nih avangin hriatchhuah ah kan tlai fo a ni." a ti a. Hlawk taka he DAY hi hmang turin kal khawmte duhsakna a hlan bawk.

He hunah hian Jane Lalduhchhungi Vanchhawng, Clinical Psychologist, DMHP chuan kalkhawmte hnenah Alzheimer's Natna chungchang zirtirna hun a hmang bawk.

World Alzheimer's Day hi khawvel pumah Alzheimer's natna chungchang in zirtirna leh a vei mek te enkawl dan chungchang in zirtirna hun atan hman thin a ni.