3839/2022-2023
Champhai, the 15th March, 2023: DCSO Champhai buatsaihin vawiin chawhma dar 11 khan World Consumer Rights Day 2023 pualin I&PR Auditorium, CHANEM-ah hun hman a ni a; he hunah hian 'Empowering Consumer's Through Clean Energy Transitions' tih chu thupui atan hman a ni.
He hun kaihruaitu Pu C.C. Sakhawliana, DCSO Champhai chuan Consumer-te dikna leh chanvo humhalh tura hmalak tawhna hrang hrangte a sawifiah a. Mitinte consumer huanga rinluh vek theih kan nih thu sawiin, dikna leh chanvo neihte hriaa chhawr tangkai turin mipuite a sawm a. District & Sessions Judge kaihhruaina hnuaiah District Commission din a nih thu leh DCSO chu Registrar a nih thu tarlangin, vuivaina leh lungawilohna nei an hnena thu thlen duhte tan an inhawn reng thu a sawi a. Online hmanga thil chah delivery charge pek vek tawh a chahtu lam ngai tlat thin te, lirthei chuan man bituk aia tam lak te, MRP aia to a thil inleitir leh vuivaina dangte District Commission-ah a tul anga hmalak sak tura thlen theih reng a nih thu a sawi bawk.
Thupui sawifiahtu Pi R. Lalnunkimi, DUDO & DTO Champhai chuan hmasawnna hrang hrang awm belh zel karah sik leh sa inthlak nasat avanga harsatna tawh dante leh hemi avanga nghawng tha lo tak takte sawiin, tu leh fate tana chenna tlak ram nuam siam tura ngaihtuahna kan sen tlan a ngai a ni, a ti a. Khawvel ram hruaituten sik leh sa inthlak danglam zel laka hmalak dan tur ngaihtuahin energy thianghlim, him leh hman nawn theih angte an buaipui nasat tawh thu sawiin, nizung leh thli hmanga energy siam kawngah Sawrkarin theihtawp a chhuah thu a sawi a. PM-KUSUM kaltlangin clean energy tam zawk siam chhuak tura hmalak a nih thu leh, Ministry of New & Renewable Energy pawhin tanpuina leh hamthatna tam tak a siam thu sawiin, electric hmang khawl leh lirthei tam zawk siam leh buaipui kawngah tanlak zel a ni, a ti.
International Solar Alliance kaltlangin India pawhin clean energy siam chhuak kawngah theihtawp chhuaha hma a lak mek zel thu pawh sawiin, Mizoramah ngei pawh Solar project lian tak Vankal Solar Park bakah a dangahte hmalak mek a ni, a ti a. Bawlhhlawh paih mai turte pawh a aia hlu leh tha zawka siam chhuah zel thin a nih thu a sawi a. Lirthei khu avanga boruak bawlhhlawh tam tak chhuak thinte enfiah a pawimawh thu leh boruak ti bawlhhlawhtu hrang hrangte hman tlem kawngah inzirtirna tam zawk kalpui a pawimawh thu a sawi bawk.
Thusawitu dang Pu C.Zaihmingthanga, Secretary, Consumer Association Champhai chuan World Consumer Rights Day hman tawh dante leh Consumer Protection Act 2019 chungchangte a sawizau a. Awareness campaign leh endikna an neih tawh dante bakah consumer an hnena kalte hma an lakpui tawh dante a sawifiah a. Consumer-te thlavang hauhtu leh hrem ngaite hremna dan Consumer Protection Act a nihna tur ang taka chhawr tangkai a la ni lo chu veiawm a tih thu sawiin, consumer dikna palzuta dan bawhchhiate hrem zel an nih theih nana tanrual a pawimawh thu a sawi a. Dan palzutna awm leh lungawilohna neihte thuneitu hnena hrilh hriat chu kan zavaia dikna leh mawhphurhna a ni, a ti bawk.
Hun hman kharna siamtu Pi Esther Leihang, SDC Champhai chuan hman khat chauh daih plastic, Single Use Plastic hmang tlem tura inzirtirna tam zawk neih leh, a taka nunpui tura tanlak a pawimawh thu a sawi bawk.
