No.7692/2020-2021

Vawiin khan khawvel hmun dangte rualin Champhaiah National Programme for Prevention and Control of Deafness bultumin 'Hearing Care For All, Screen, Rehabilitate, Communicate' tih thupui hmangin World Hearing Day puala hun hman a ni.

He hun District Hospital OPD Complex-a hman Dr. Zatluanga DMS Champhai  kaihhruaiah hian Dr.Lalramengi, ENT Surgeon chuan 'Hearing Care For All, Screen,Rehabilitate, Communicate' tih thupui a sawifiah a. Beng chu hriatna pawimawh tak a nih avangin enkawl uluk a ngaih thu sawiin, enkawl uluk loh chuan rualbanlohna hial
thlen thei a ni a, naupangah fimkhur zual a ngai a, thil zum leh hriam, thir lam chi te'n kan hawlh tur a ni lo a, tui kan ti lut tur a ni lo, a ti a. Beng lama harsatna neih chuan a rang thei ang bera mithiamte pan a tul thu sawiin, bengdar vuah a tul pawha vuah hrehlo turin kalkhawmte a chah a ni.

Pi Mimi R. Laltlanhlui, Audiologist chuan National Programme for Prevention and Control of Deafness (NPPCF) chungchang report pein, Champhai District-ah October, 2015 atanga kalpui tan a nih thu leh thawktu mi pathum Audiologist, Audiometric Assistant leh Hearing Instructor te'n an kalpui mek thu a sawi bawk.

NPPCD Champhaiah hian kum 2019 atang 2021 February thla thleng khan damlo 4957 an in entir tawh a, chung zinga 1783 te chu ri hriatna lama harsatna nei an ni a, heng zinga 585 te chuan engmah an hre thei tawh lo a ni. Bengdar vuah ngai mi 216 awm tawhin beng lama harsatna nei mi 1014 an endik tawh bawk a ni.

Pi Lalnunmawii, Audiometric Assistant chuan lawmthu sawina hun a hman zawh hnuah beng lama harsatna neite tan a thlawna inentirna buatsaih nghal a ni.