Vawiin khan Mizoram hmun dang rualin Champhai District Vector Borne Disease Control Programme huaihawtin World Malaria Day-2018 chu CMO Conference Hall-ah hman a ni. Kumin Malaria Day thupui atan hian Malaria hneh turin inpeih rawh 'Ready to beat Malaria’ tih chu hman a ni.
He hun hi Dr. Vanlalnghaki, CMO Champhai District Hospital chuan a kaihruai a. Malaria do hneh turin Health Depertment hmalakna mai a tawk loh thu sawiin, NGO hrang hrangte chu thawhpuiah a sawm a. Khawvela cheng mi maktaduai 33 te chu Malaria natna vei thei reng dinhmunah an din mek thu leh kumtin mi maktaduai 4 in Malaria natna an la thihpui ziah thin thu a sawi a. Malaria chu khawvela natna thihpui tam berte zinga pangana a ni mek a ni, a ti.
He hunah hian Dr. R Lianmawia, District Malaria Officer (DMO) pawhin thusawiin Malaria natna pu darh theitu thosi chu rannung te reuhte, hote anga lang ,mi tak tak thihna thlen theitu anih avangin ralpui phiara kan phiar a ngai a ni, a ti a. Champhai District chu Mizoram District zinga Malaria tlemna ber a ni thei chu lawmawm a tih thu a sawi a. Dinhmun duhawm taka Champhai District-a awm theihna chhan chu Damdawi lama thawktute'n tha taka hna an thawh vang leh mipuiten tih tur an hlenchhuah avang a ni, a ti a. Champhai District-ah a kum telin Malaria a tlem tial tial thu a sawi bawk a. Malaria tlemna ber district kan nih avang ringawtin kan inthlahdah tur a ni lo va, Malaria umbo ngei tura tan lak sauh sauh a tul a, Malaria hrik pai thosi inthlahpung thei lo va siam leh, Thosi inseh tir lo tura inven hi Malaria natna umbo dan awlsam ber a ni, a ti bawk.
Pi Lalhmingmawii, DVB Consultant hnen atangin Champhai District report ngaihhtlak a ni a. Kum 2017 atangin Champhai District-ah DDT kah a nih tawh loh thu leh Mizorama DDT kah ngaihlohna district awm chhun a nih thu a tarlang a. Kum 2017 atanga vawiin thlengin Champhai District chhungah Malaria vanga thi an la awm lo a. Kum 2014 khan thisen test mi 15,594 atangin Malaria hrik mi 95 ah hmuh a niin, mi 2 in an thih phah a. Kum 2015 khan thisen test 13,955 atangin Malaria hrik mi 63 ah hmuh niin mi 1in a thih phah a ni. Kum 2016 khan thisen test 14,514 atangin Malaria hrik mi 31 ah hmuh niin mi 1in a thih phah a. Kum 2017 khan thisen test 7963 atangin Malaria hrik mi 5 ah hmuh niin tumahin an thihpui lo a ni. Champhai District bikah AVI (Annual Parasite Incidence) chu DDT kah ngai chin 2 aia hniam 0.03 anih avangin DDT kah ngailo District a lo ni thei ta a ni.
Malaria Day pual hian tukin khan Champhai Hospital Veng KTP-te nena tangkawpin Cleanliness Drive an lo nei tawh a. Chawhnu lamah Leaflet an sem bawk a ni.
