Vawiin khan World Veterinary Day 2019 chu hmun dang rualin Champhaiah pawh hman a ni.
He hun hi Champhai AH & Vety Department Hospital kawtah neih niin thupui atan ran hri venna hlutna tih hman a ni a, Dr. C. Lalsawithuama, Chief Veterinary Officer chuan an thupui denchhenin ui hri venna hi a thlawnin ui neitu kalkhawm te hnenah an pek tur thu an sawi a, ui a hri hi natna hlauhawm tak niin ui chauh ni lovin mihring te pawhin he ui a hri hi an kai theih avangin tihdam theih ni lo mahse ui a hri danna hi ngaihpawihmawh a tul thu a sawi a ni.
Dr. C. Lalsawithuama chuan Ui hi ran dang te ang lo takin a vuhtu mihring te hian an ngainat bik thu sawiin kan chenpuiin kan mutpui a, kan inngheng hnai bik a, kan infiampui fo thin an nih avang in mi an seh hrim hrim bakah tihpalh thil thuah an ha in min hliam palh a awm thei a, heng te hi ui seh nen thuhmun reng a nih avangin a hlauhawm dan a inang reng a, a hun taka ui a hri danna hi kan lak thin a pawimawh a ni a ti. Mi kan changkang zel a, kan changkan zelnaah hian kan ran vulh te duatna kawngah pawh kan changkan tel zel a ngai a ni tiin an ui vulh te hri danna pe tura hruaitu te chungah lawmthu a sawi a ni.
World Veterinary Day 2019 hi Indian Veterinary Association, Mizoram State Vety Council leh AH & Vety Department Mizoram buatsaiha neih a ni a, he ni denchhen hian a thlawna ui hri danna pek thin a ni. He ni hi kum 2000atang khan hman tan niin kumin hi a vawi 20 na a ni a, kum tin April thla chawlhkar hnuhnungber Inrinniah he hun hi hman thin niin vawiin khan ui 32 te hnenah ui a hri danna hi pek a ni.
