4301/2023-2024
Champhai, the 22nd March, 2024: PHED, Champhai WATSAN Division buatsaihin tukin dar 7:00 khan I&PR Auditorium, Champhaiah 'Khawvel Tui Ni/ World Water Day, 2024' pualin inzirtirna hun 'Inrem Nan Tui/Water for Peace' tih thupui hmanga hman a ni a; hemi hnu hian World Water Day, 2024 denchhenin tui humhalh leh renchem a pawimawhzia inzirtirna kawngzawh CHANEM building atanga Circuit House thleng neih a ni. He hun hi District Bawrhsap Pu James Lalrinchhana, Chairman, District Water & Sanitation Mission (DWSM) chuan khuallian niin a hmanpui a ni.
Khuallian District Bawrhsap Pu James Lalrinchhana chuan Wolrld Water Day kan hman chhan, he ni hian enge min zirtir a tum tih leh nikum a hun hman leh kumin inkarah hmasawnna kan nei em tihte chu inenfiahna tham a tling a ni, a ti a. Kumin World Water Day thupui 'Inrem Nan Tui' tih chu sawizauin, tui inchuh avangin ram leh state-te an lo intihbuai fo tawh thin thu a sawi a. Mizoramah ngei pawh khua leh khua inkarah tui inchuhna a lo thleng fo tawh thin tih sawiin, hei hian tui hlutna leh nitin khawsak kawnga a tel lova kan awm theih loh zia a tarlang chiang hle a ni, a ti a. Tui chu hmasawnna bulpui ber a nih thu sawiin, World Water Day puala hun hman chuan Champhai District hmasawn zel nana tui pawimawhna leh hlutna mipui thinlungah nasa zawka a tuh belh ngei a beisei thu a sawi bawk.
District Water & Sanitation Mission (DWSM) Chairman Pu James Lalrinchhana chuan sik leh sa nuam, ramngaw leh thlai thar tha tak a awm theih chhan chu tui hnianghnar taka kan neih vang hi a ni tiin, kalkhawmte chu tui pawimawhna leh hnathawhte ngaihlu thiam tur leh midangte zirtirtu nih tum theuh turin a sawm a. Khawvel sik leh sa danglam chho zelah tuihna siam kawngah theihtawp chhuah a tul thu sawiin, tuihna siamtu pawimawh tak ramngaw chereu zel tur ven bakah thingphun belh leh lui hnar tha taka humhalhte chu hmalakna tur pawimawh tak a nih thu a sawi a. Champhai khawpui tan pawh nakin zel ngaihtuah chungin tui mamawhte phuhruk a nih theih nan ngaihtuahna sen lawk a tul thu a sawi a. Thing leh mau, nungcha leh khuarel siam mawina hrang hrangte nena inrem tlang taka awm chu kan zavai tana tha ber a nih thu sawiin, Pathian thu leh environment humhalh hi a kalkawp tlat a ni, a ti bawk.
Resource person Er. Thanchungnunga, SE, PHED Champhai WATSAN Circle chuan tui leh a kaihhnawih avangin kumtin khawvel pumah mi nuai 14 dawn an thih thun thu sawiin, khawvel puma mihring awm za zela 25 velin tui thianghlim mamawh khawp an hmuh loh thu a sawi a. Tun atanga kum 25 velah tui mamawhna za zela 50 dawna pung chho tura chhut lawk a nih thu sawiin, khawvel hmasawn zelah tui mamawhna a pung zel a, kan neihsate tha taka kan humhalh loh chuan hun reiloteah kan chan thei dawn a ni, a ti a. Jal Jeevan Mission (JJM) hnuaiah Mizorama thingtlang khua 678 ah mi pakhat tan nitin tui litre 55 zela chhutin in tinah tui connection pek tuma hmalak a nih thu sawiin, in tinah tui duhkhawp kan pek theihna tur chuan tuihna kan humhalh tlat a ngai a ni, a ti a. Champhai khawpuiah tui connection 6,000 chuang a awm mek thu leh rualkhai taka tui sem thin a nih thu sawiin, mipuite chu renchem taka tui hmang thin turin a sawm nghal bawk.
Thusawitu dang Sub-Hqrs. YMA (SYMA) Champhai President Pu F. Lalrinmuana chuan tui thlakthlengna dang a awm loh thu sawiin, thalaite chu tui humhalh pawimawhnate vei thar tur leh danglamna thlentu nih tum tlat turin a chah a. Champhai khawpui kianga tuikhuah pawimawh tak Keilungliah vawnhim leh tihfai kawngah tanlak tlan a tul thu a sawi bawk.
He hun hi Er. Z.D. Dengthuama, EE, PHED & Member Secretary, District Water & Sanitation Mission chuan a kaihruai a. Tui renchem leh faina kawnga theihtawp chhuah tura intiamkamna Pi Julie C. Mawii, Coordinator, Champhai District kaihhruaiin sawi rual a ni a. Er. Vanlalmuanawma, SDO, PHED Champhai Project Sub-Division-in lawmthu sawiin hun hman a khar a. Hemi hnu hian World Water Day pual inzirtirna kawngzawh District Bawrhsap Pu James Lalrinchhana'n a vai liam a; Rally hi CHANEM building tualzawl atanga Circuit House kawt thleng neih a ni.
World Water Day pual hian Champhai District chhunga WATSAN Committee thawktha lawmman sem chhuah a ni a; hei hian Citation leh Momento kengtelin lawmman dawngtute chu:
1) Pakhatna: Bungzung WATSAN Committee
2) Pahnihna: Selam WATSAN Committee
3) Pathumna: Sazep WATSAN Committee
Kum 1992 khan United Nations General Assembly chuan khawvelah hian tui duhkhawp leh thianghlim a awm zel theih nan tui awm sate awmze nei taka hman a tulzia leh, chumi kawnga mi zawng zawng lungrual taka kan thawh ho theihna turin March ni 22 hi World Water Day atan a ruat a, kum 1993 atang khan khawvel pum huapin he World Water Day hi hman tan a ni.
Vawiin World Water Day 2023 pual hun hmanah hian JJM & SBM (G) Implementation Supporting Agency (ISA) te, WATSAN Committee-te, Govt. Champhai College (GCC) zirtirtu leh zirlaite an tel a ni.
Attachment
- Loading attachment...
