Khawvel hmun dangte rualin  World Water Day 2019 chu PHE Department leh Sub Hqtrs YMA Champhai bultumin Champhai Zotlanga DIET Hall-ah hman a ni a. He hunah hian   Champhai DFO Pu C. Lalbiaka, IFS, chu Khuallian ani. Vawiin thupui thlan chu ‘Leaving no one behind’ tih a ni.

Khuallian chuan Tui chu thil hlu tak thilnung tinreng te mamawh leh a telloa a an awm theih loh thu a sawi a. Kan mamawh kan ban phak maia a awm hi Mihringte chanvo a ni a, kan chanvo hi kan chang lo nasa em em a, kan duh tawk tui kan nei thei meuh lo a ni a ti bawk. Khawvel hmasawnna kal zel ah khaw nuam ni tur chuan tui hniang hnar khua nih a ngai a ni a ti a, tui tam lohna khua ah chuan fai pawh a har thu a sawi a ni.

Pu  C.Lalbiaka chuan Tui ngah leh ngah loh hi kan economic than leh than loh innghahna pakhat ani a ti a, tui a tam chuan thlai leh thei ei tur a tam a, tui tlem chuan thlai leh thei hmanga eizawng te hian harsatna an tawk thin a ni a ti a. Tui chu mihringte tihlimtu anih tbhu sawiin, tui awm lohnaah chuan tumah kan awm tha peih lova, hetiang a nih avang hian tui pawimawhna kan hriatchian a tul a, hmanralna chauh ngaihtuah lova, tui hna hrang hrang kan venhim a, uluk taka kan enkawl a ngai a ni, a ti a.  Ramngaw  humhalha tuihna siam kawnga tanlak angaih thu leh hemi lama mitinte thanharh thar a ngaih thu a sawi bawk a ni.

He hun hi Champhai PHED WATSAN Circle SE Er. HB Chakma chuan kaihruaiin Er. Laldingliana Hrahsel, EE, I&WRD Champhai chu Resource Person a tana hman a ni a. Er. Laldingliana Hrahsel chuan khawvel ram inzawmkhawm pa, United Nations Conference on Environment and Development chuan kum 1993, March ni 22 khan World Water Day  a lo hmang tan   a, hemi kum atang huan World Water Day hi thupui thlanbik neiin kumtin khawvel hmun hrang hrangah hman thin a ni a ti. Hmasawnna tluantling kan neih theihna atana tui leh a hna enkawl that tih chu UN 2039 Agenda atan kum 2015 khan puan a ni a ti a, he Agenda hian mitin tan tui in tlak chhawpchhuah chu a tum lian berte zinga mi anih thu a sawi bawk.

He hunah hian Sub Hqtrs. YMA Champhai lam atangin Tuihna humhalh kawnga YMA leh PHE Department te thawhhona kawnga hlawhtlinna te tarlan a ni a. Zawhna leh chhanna hun te hman anih hnuah Pu RL Thianghlima, Principal, DIET Champhaiin he hun hman hi a khaikhawm a. Lawmthu sawina neih anih  hnuah hun hman hi  khar a ni.