Ni 8.9.2012 leh ni 5.10.2012 a leimin vakna hmun Chanmari atanga Chaltlang pan chhohna kawngpui chhak chu min leh mai hlauhthawn awm anih avangin Aizawl District Disaster Management, Aizawl DC Office leh Chandmari khawtlang hruaitute hmalakna in thenfai hna thawh mek a ni.

Nimin zing dar 5:30 atanga thawk tanin helai hmun thenfai hna hi thawh a ni a, lung leh lei chim mai thei awm ang chite chu karthlak an ni a. District Disaster Management ten a senso tumin, Chanmari Local Council enkawlna hnuaiah hlawhfa chhawrin thawh a ni. A him chin anga lang hi wire mesh (thirzar/thirlen) hmanga khuh khawmin an kaih bet a ni. Lung leh leivungte hi PWD ten an paih fai ve thung bawk.

Chanmari Local Council Chairman Pu Lalzuiliana leh Vice Chairman Pu F. Lalhmangaiha te chuan an vengchhunga leimin hauhawm tak chu an vei hle thu leh an bialtu MLA Pu Lal Thanzara, Parliamentary Secretary leh Aizawl District Disaster Management, DC office te hmalakna a zara thenfai hna an thawk thei ta chu lawmawm an tih thu an sawi.

Tukin zing dar 7:30 khan Pu Lal Thanzara, Parliamentary Secretary chuan hnathawhna hmun hi a tlawh a, hmalakna tha taka a kaltluang chu lawmawm tiin, vantlang tana hlauhawm thei thenfai hna thawh a ni chu mipui him nan a pawimawh em em a, helai hmun mai lo pawh Aizawl khawpui chhungah In sak sa thiah ngai, mipui tana him lohna siamtu a awm nual thu a sawi.

Pu Lal Thanzara hi Aizawl District Disaster lam hotu Pu J. Hmingthanmawia, Addl. D.C.; Pu Rothuama, SDO (Sadar); Pu Lalremruata Kullai, SDC bakah Pu David L. Thangliana, CMO I & PR leh Pu David-a, SDO, PWD ten an tawiawm a ni.

Vawiin vek khan Aizawl DC office ah Disaster Zonal Officer te kokhawmin, an bial theuhah In sak himlo leh leimin hlauhawm awmte endik a, report thehlut turin hriattir an ni.