Vawiin khan Art & Culture Minister Pu R.Romawia hovin a pisa-ah Organising Committee chuan Chapchar Kut 2015 hman dan tur an rel.

Kumin Chapchar Kut hman dan tur rela Organising Committee thutkhawm vawihnihna ah hian Programme Sub Committee in Kut hman dan tur chipchiar a rel chu thlir hovin, siamthat ngai lai te siamtha a pawm a ni a. Mizo hnam lam chi hrang hrang en tur leh zaithiam zai ngaihthlak tur a awm dawn a ni. Kum danga la tih ngai lem loh pipute ral beih dan lemchan thlirho tur a awm ang a, pipute’n kut nikhua a kut sa ei leh chhawnghnawh an tihdan a taka entirna ‘Kut Ruai’ chu CYMA in an nei ang a, a huhova violin tum ‘mass violin’ ngaihthlak tur a awm ang. Hei bakah hian IMFA lamin traditional costume show an entir ang a, kut chhim tura kal Mizo hnam incheia inchei naupangte hnen atangin ‘Mizo naupang inchei’ entir a ni ang a, NEZCC atangin hmarchhak hnam hrang hrangte lam ‘choreographed folk dance show’ entur a awm bawk ang.

Chapchar Kut lawmna Lammual sir ah Food Fest buatsaih tum a ni a, a duh apiangte lei theih turin handloom stall hawn tum a ni bawk. Kut pual hian Assembly Annexe building ah Flower show-cum-sale neih tum a ni a, Vanapa Hall-ah Photo leh Painting exhibition buatsaih tum a ni bawk. Chapchar Kut hi District Headquarters tinah hman tum a ni a, a lawmna pui ber Aizawl Sipai Lammual a neih tur hi a hmuna chhim ve theilo te thlir theih turin DDK atangin live a pek chhuah tum a ni bawk.

Organising Committee Chairman Art&Culture Minister Pu R.Romawia chuan hlim leh lawm takin Chapchar Kut hi hman a nih ngei a beisei thu sawiin zu leh ruihhlo lakah erawh Kut hmangtute fihlim turin a ngen a ni.