Kumin Chapchar Kut lawmna atan inbuatsaihna chu ngawrh taka kalpui mek a ni a. Chief Minister Chairman na hnuaia Organising Committee in kumin Chapchar Kut lawmna atana ruahmanna a duan te chu Sub-commitee hrang hrang ten chak taka bawhzuiin Kut lawmna atana a bul tumtu pawimawh Art & Culture department leh CYMA te bakah sorkar department pawimawh te leh chanvo neitu hrang hrang ten ngawrh takin inbuatsaihna an kalpui mek a ni.

Kumin Chapchar Kutah hian Khuallian atan Pu Salai Lian Luai, Chief Minister, Chin State, Myanmar sawm a ni a. Kut lawmna tur hmun Aizawl Sipai Lammual chu uluk taka chei leh buatsaih niin February 3, Chapchar Kut ni hi a lawmna hmunpui berah chuan hnam lam chi hrang hrang leh zai rimawi te bakah Mizo kutchhuak puan leh thiamhnang thil siam chi hrang hrang te pho langa ropui taka lawm tum a ni a. Kut lawmna pual hian Vanapa Hall ah Photo Exhibition, Transport department building sak thar mekah Flower Show leh Aizawl Art Gallery ah Painting Exhibition te buatsaih a ni dawn bawk a ni.