No.2967/2020-2020

Dated Serchhip, the 10th July, 2020: Vawiin hian Serchhip kiang Mat lui phaia Chawm zau panna kai, Chawm Kai tia sawi hmuna thir lei (Galvanised Bailey Bridge) leh Thenzawl leh Buarpui inkara Tlawng lei Steel D-Bow Trussed Girder Bridge dawh thar chu Er. K. Lalsawmvela, MES, Engineer-in- Chief, PWD chuan a hawng.

Chawm lei hawnna hi neih hmasak niin khuallian Er. K. Lalsawmvela'n a hmunah a hawnna lungphun leh ribbon a chehchah hnuah, he lei kiang lawka Farmer Training Centre ah a hawnna inkhawm tawi buatsaih zui a ni a. He inkhawm kaihruaitu Er. R. Lalrintluanga, MES chuan, vawiina hawn tak lei pawimawh pahnih te chu Chief Minister ngeiin hawng se ka duh laiin Covid19 vangin beisei angin kan buatsaih thei ta lova. Chief Minister ruahmannain kan Engineer-in- Chief hovin kan hawng ta a ni, tiin programme buatsaih dan a sawifiah a ni.

Lei hawngtu Er. K. Lalsawmvela chuan, hmun tam takah PWD ten lei kan lo dawh tawh a, chung leite chu khaw karkawng lei an ni deuh vek a. Mahse vawiina kan hawn Chawm lei erawh chu loneitute feh kawng a ni tlat mai a, a dangdai hle a ni, a ti a. Tin, Galvanised Bailey Bridge hi Mizoramah a pahnihna a ni a, Mizoram PWD ten kan thawh hmasak ber a ni bawk a, a hlu hle a ni, a ti. He lei hi kum 20 chhung chu engmah tuaithar ngai lova tha tura beisei a ni, a ti bawk a. Amaherawh chu a thir tichhe thei thilte kan tih hnan fo erawh chuan a danglam thei thung ang, tiin lei that theih chin a sawi a. Mizoramah Lei 162 a awm mek thu leh dawh mek 26 a awm thu a tarlang bawk.

He hunah hian Er. C. Lalthlamuani, Sr. EE, PWD Serchhip chuan technical report a pe a. Chawm lei chu NEDP 2018-19 sum Rs. 513 lakh hmanga thawh a nih thu a sawi a. A lung hi ni 28.10.18 ah khatihlaia Chief Minister leh bialtu MLA Pu Lal Thanhawla'n a phun a. Sub soil investigation te tilehin foundation hna thawh zui nghal a ni a. Heng a lei innghahna tur pawimawh (Abutment) te hi thawh fel a nih hnuah a thir lei chin super structure dawh hna hi Garden Reach Shipbuilders & Engineer ltd, Kolkata ten ni 1.4.2020 ah an thawk tana, ni 15.4.2020 ah hun tiam chhungin an zova ni. Lei sei zawng hi feet 180 a ni a, a zau zawng hi feet 10 leh inches 9 a ni a. Double Double Reinforced Galvanised Bailey Bridge Steel Decking a ni a, a Tuiek thei lo tura ngaih a ni. A loading class hi 24 R niin quintals 200 (20 MT) a rit dawl zo tura ngaih a ni. Lirtheite chuan zawimuangin (10 km per hour) in an zawh kai tur a ni a, leiah an ding khawmuang thiang lo a ni. He lei hi Zawlpui leh a chhehvel zau, thlai chinna hmunpuia hnathawktu chhungkaw za chuang ten tangkai takin an hmang thei dawn a, heng zau atang hian buh leh sangha bakah thlasik thlai atang ringawt pawh kum tin Rs. 400 lakhs man vel tharchhuah thin a ni.

Pu PC Siamliana, President, Agri & Horti Co-operative Society, Serchhip chuan thusawina hun a nei a. Kut hnathawktute tana Chawm lei tangkaizia hi sawifiah thiam a har zawk a, a chhawr tangkaitu tur kuthnathawktu za tel ten kan thlir ning thei lova ni, tiin sawrkar chungah lawmthu a sawi a ni.

Chawm kai lei hawn zawh hian Thenzawl leh Buarpui inkar Tlawng luia dawh Steel D-Bow Trussed Girder Bridge hawnna Er. K. Lalsawmvela, E-in- C hian a nei zui leh a. He lei hawnna inkhawm tawi hi Lei bula Company te Camp ah neih zui leh a ni.

He hun Er. J. Zothanpuia, Chief Engineer, Planning kaihhruaiah hian Er. H. Zoramliana, Project Director, PIU (ADB) PWD chuan technical report a pe a. He lei hi Serchhip leh Buarpui inkar kawng laihzauh leh siam that hna Asian Developmen Bank loan hmanga NE States Road Investment Programme Scheme hmanga thawh mek chhunga mi a ni a. He hna Consultant hi MSV International Inc, USA te niin contractor chu M/s Tantia Construction Ltd, Kolkata an ni. He lei sei zawng hi meter 63 niin Rs. 19.50 crore senga dawh a ni a. Thir ruhrel tha tak leh a chhuat concrete niin a lei thir rih zawng ringawt pawh hi Metric ton 250 a ni a. Leiin a dawl zawh chin hi 70R IRC Class AA a ni a, chu chu 100 MT tihna a ni. Lei Design tute hi Blue Hill Engineering, Aizawl niin IIT Kharagpur ten an endik leh vek a ni.

Vawiina Er. K. Lalsawmvela'n Lei pahnih a hawnnaah hian PWD official lian te an tel tha hle a. Serchhip district MJA member tel an telpui bawk.