Vawiin khan Bilkhawthlir Kuhva Chingtu Co-Operative Society Ltd Office, Bilkhawthlir ah Cheng Nuai 35 senga NLUP Implementing Board (NIB) in a siam Mizorama kuhva chiahna (Skop) hmasa ber Chemphai ami enkawl dan tur Inremna thuthlung chu NLUP Implementing Board leh Bilkhawthlir Kuhva chingtu Co-Operative Society Ltd ten an ziak.
Inremna hi NIB aiawhin Pu James Lalrinchhana, Secretary in a ziak a Bilkhawthlir Kuhva Chingtu Co-Operative Society Ltd aiawhin an President Pu Thangtama’n a ziak a ni. He inremna “NLUP Arecanut Processing Plant Agreement” ah hian Kuhva Skop na hmun enkawl tu tur Committee 2 din niin, Kolasib Bawrhsap Chairman na hnuaiah Managing Committee leh Bilkhawthlir BDO Chairman na hnuai ah Operational Committee din a ni.
He inremna hi NIB Chairman Pu JH Rothuama hriatpuina hnuaia ziah niin Pu JH Rothuama chuan NLUP in a tum ber chu kuthnathawktuten an hnathawh rah anmahni ngeiin an seng hi a ni a; chuvangin kuhva chingtuten hlawk zawka an hnathawh rah an seng ngei theih beiseiin kuhva skop na pawh hi siam a ni a ti a. A enkawlna dan an siam hi kan zavai tana tha tur a ni tih hria a, tha taka zawm vek turin kalkhawm te a sawm a, kum kalta a Chemphai Kuhva Skop na hawn a nih tuma alo tiam tawh angin a tih changtlun belhna tur pawisa cheng 19,98,200/- chu Bilkhawthlir Kuhva Chingtu Co-Operative Society Ltd te hnenah a hlan a, Chemphai a Kuhva Skop na hmun pawh tlawh nghalin Society hruaitu te nen hmalak dan tur a hmunah an en nghal a ni.
Society President Pu Thangtama pawhin NIB hmalakna a kuhva Skop na tha tak an nei thei chu lawmthu sawiin Bilkhawthlir mai nilo Mizoram pum in an chhawr theih nih an tum thu leh Mizoram pawn atanga Kuhva lo lut thin ai a tha zawk leh tlawm zawk an siam theih dawn thu a sawi bawk a ni.
Chemphai Kuhva Skop na hi Bilkhawthlir Kuhva Chingtu Co-Operative Society Ltd ten an enkawl a, tunah hian Kuhva Skop na tuikhuah pindan 3 awmin Pindan 2 ah Indian Variety kuhva rah nuai 13 an chiah mek a, pindan 1 ah hian Assam Variety kuhva rah dah tumin an inbuatsaih mek a ni. Chemphai Kuhva Skop na hi NIB Engineer te leh Marketing Task Force Member ten India ram hmun hrang hranga Kuhva Skop na an zirchian hnu a a tha thei ang ber tura an ruahman a ni.
NIB Chairman hian Bilkhawthlir a Thlertawi Self Help Group ten Kuhva kau atanga Disposable plate an siamna hmun a tlawh bawk a ni.
NIB Chairman hi Pu James Lalrinchhana, Secretary NIB, Pu Andrew H Lalremruata Media Officer, NIB, Pi Lalduhzuali, BDO Bilkhawthlir , Pu Ronald lalchhuanawma, Member,NIB Marketing Task Force leh Er. Laltluangkima ten an tawiawm a ni.
