Mizoram sawrkar Mizoram Youth Commission(MYC) kaltlangin Mizorama thalaite zinga midangte entawn tlak, kum 40 aia upa lo, kawng hrang hrang - zirna, eizawnna, hnathawhna leh mawhphurhna hlen chhuak tha - mi hlawhtlinga vantlangin an pawm te chu thlang chhuakin lawmpuina sumfai cheng nuai khat kengtel ," MYC Young Achiever's Award" a hlan dawn.
MYC Thalai Hlawhtling Chawimawina chungchang hi MYC Chairman Pu Joseph Lalhimpuia chuan sawifiahin MYC Young Achiever's Award chu Mizo thalaite chawhphurna leh thahnem ngaizual tura fuihna atan buatsaih ni a tih a sawi a; MYC Young Achiever's Award dawngte chu an hmalak chhunzawm zelnaah te MYC chuan tanpui dan pawh a ngaihtuah ang a ti. MYC Chairman chuan, "Sawrkar chuan thalaite khawvel zauh ang aw tiin kawng tinrengah hma kan la chho mek a; tin, kan inghahna thalaite hian ngaihsan tur dik an hriat kan duhsak bawk a ni",tiin Mizo thalaiten ngaihhlut tur diktak an hriat a hun tawh hle niin a sawi bawk a ni.
MYC Young Achiever's Award buatsaihna turah hian District tinah Deputy Commissioner Chairman-na hnuaiah District Level Committee pawh din a ni tawh a, District tinah mi 10 aia tam lo Young Achiever thlanchhuah hmasak tur a ni a, District in a thlanchhuah candidate te hi State level Committee-in a lo en thlifim leh dawn a ni. MYC chuan mipuite hnenah an awmna District-a mi leh hmun danga mi pawh lawmman dawngtlak nia an hriatte chu District Committee hnenah hriattir turin a ngen bawk a ni.
