Kumin inthlan inpuahchahna kalzelah vawiin khan EVM semrualna tawpna ber neih taka Polling Station tina kal tur EVM ruatte chu endik leh vek a ni a. Vawiin EVM khawlte endikna hi Constituency pathum 21-Lengteng A/C DRDA Office-ah, 23-Champhai North A/C DRDA Office-ah leh 24-Champhai South A/C DC Office ah te neih a ni. 22-Tuichang A/C leh 25-East Tuipui A/C te tan he endik hna hi Inrinni kalta November Ni 17, 2018 khan District Panchayati Raj Resources Centre-ah neih a ni tawh bawk.

Vawiin EVM endikna tura Strong Room hawn, vote thlak chhin Mock poll leh Strong rooma dah luh leh laite hian Pu Debashis Das, IAS, General Observer, 21-Lengteng (ST) A/C & 22-Tuichang (ST) A/C; Pu Narander Kumar Meena, IAS, General Observer 23- Champhai North (ST) A/C, 24-Champhai South (ST) A/C & 25-East Tuipui (ST) A/C; Dr Naveen Aggarwal,IAS, District Election Officer, Champhai, RO, ARO, Political Party aiawh, election official leh Security personel te an tel a ni.

Hetih rual hian vawiin vek khan inthlan laia duty tur mahni vote neihna polling station a vote thlak ve hmanlo turte pualin vawiin khan vote thlak tan niin vawiin hian vote 61 a tla a, vote hi naktuk November Ni 20, 2018 leh naktip November Ni 21, 2018 thleng a thlak theih a, Ballot paper hmanga vote thlak thei tur hi Champhai District ah mi 1127 awmin District danga thawn chhuah 259 a awm bawk a ni.