Vawiin chawhma dar 11 khan Health & Family Welfare Department hmalakna in Government Middle School Chhiahtlangah Kawthalo Do beihpui thlak hawnna hun hman a ni.

He huna khuallian Pu Dothanga, Chairman Joint Village Council Serchhip Town chuan, hriselna hi kan ngaihlu tur ani a, naupangte rilruah hian kan tuh ngheh a tul a ni. Mahse naupangte hian hrisel tura tih tur te an hre nghal mai bik lova, taima taka kan zirtir a ngai a ni. Chutiang a awm theih nana Kawthalo Beihpui Thlak denchhena mithiam zawkten Chhiahtlang naupangte zirtirna an nei hi a ropui hle a ni,a ti.

He hun kaihruaitu Dr. Laldawngliana Sailo, CMO Serchhip chuan India sawrkarin ruahmanna a siam Kawthalo do beihpui hman anih chhan sawiin faina kawnga hmasawnna hi hmanraw pawimawh ber a ni a ti a, fai taka kut sil hian natna tam tak kan pumpelh thei a ni a ti. Kawthalo kan lo kai palh hlauh anih chuan a tam thei ang ber ORS in thin tur a ni a, Health Sub Centre tinah leh Anganwadi Centre tinah dah a ni a, ASHA ten in tinah naupang kum 5 hnuai lamte hnenah an sem tur thu a sawi bawk.

He hunah hian Nl. Lalsangpuii, Counsellor RMCHH chuan kut silfai dan naupangte an zirtir a ni.