Vawiin chawhnu dar 2.00 khan State Disaster Management Authority huaihawtin New Civil Secretariat Complex, Khatla-ah chhiatna liantham a insingsak dan (mock-drill) enchhin a ni a; hetah hian lirnghing na takin New Secretariat Complex building-te hi a sawi anga ngaihruatin, kangmei a chhuah bakah, in chim avanga thi leh hliamte an awm a ni.
He mock-drill hi a tak ang thei ber tura ruahman a ni a, hnathawktute pawh hriattir lawk an ni lo va; chhanchhuah hna thawktu turte pawh ral atanga koh chawpa lokal tura ruahman a ni. Dar 2.00 a rikin ralkhel dar nasa taka tihrik a ni a, hnathawktute chu police-ten awmze nei takin an tlanchhuahtir a. Hemi hnu hian Fire & Emergency Service lamte lo thlengin, chhanchhuah ngaite an buaipui a, kangmei chhuakte tuiin an phuh hlum a. Sports & Youth Services leh Central YMA hnuaia Adventure Team leh Rescue Team te an rawn thleng zui a, anni bakah hian 3rd Bn MAP atangin rang takin State Disaster Response Force te, Medical Team te, Power & Electricity Dept. te, I&PR Team te, PHE Dept te, MPRO te, DM&R Team te, Police te an rawn thleng zui nghal bawk a ni. Vawiina mock-drill-ah hian awmze neia tlanchhuah dan te, hliam bawihsawm leh senghawi dan chi hrang hrangte a taka entir a ni.
Mock-Drill zawh hnua inkhawm buatsaihah Disaster Management & Rehabilitation (DM&R) Minister Pu Nihar Kanti Chakma chuan thu sawiin “ Kan ramin chhiatna kan tawk zauh zauh a; Civil Secretariat phei chu sawrkar hotu lute leh mi pawimawh tam zawkte hnathawhna hmun a nih avangin chhiatna lian a lo thlen pawha tluang taka sawrkar inrelbawlna a kal theihnan insaseng dan leh mahni inbuaipui dan kan thiam a tul a ni” a ti.
Chief Secretary a nihna bakah, Chairman, State Executive Committee leh Chief Executive Officer, State Disaster Management Authority mawhphurhna chelhtu Pi L. Tochhawng pawhin thu sawiin, “Kan ram leilung hi a ngheh loh avangin chhiatna lian tham lo thleng thei laka kan inralrin hi a pawimawh a; lo inralrinna hian chhiatna avanga kan tawrh theihna tur chanve lakah min tifihlim thei a ni’ a ti. Sawrkar Department hrang hrangte leh Central YMA te nena lungrual taka thawk hova, mock-drill hlawhtling tak buatsaih a ni chu lawmawm a tih thu Chief Secretary chuan a sawi bawk.
Pu P.C. Lallawmsanga, Principal Secretary, DM&R pawhin lawmthu sawiin, ‘Hetianga mock-drill neih hi Civil Secretariat-ah hian thil tul tak a ni a. Kang thelhna tura kan fire-extinguisher dahte pawh duhthusam a ni zan lo tihte kan hriatchhuah phah a ni” a ti.
