Mizoram Sorkar hnuaia Disaster chungchanga Committee sang ber dawttu State Executive Committee (SEC) chu vawiin chawhnu dar 1:00 khan Chief Secretary Conference Room-ah an Chairman, Chief Secretary hovin an thukhawm.

Chairman Pi L.Tochhong chuan Committee koh chhan leh an thurel tlangpui tur a tarlang hmasa a. Chhiatrupna thlen thulha hmanraw pawimawh ber pakhat - Silpaulin / Poly-Tarpaulin lei dan leh a sem zai dan kawngah te fimkhur leh uluk taka kalpui tul a tih thu a sawi. Vawiina an thurel langsar zual deuh zingah tunhnaia Laipuitlang chhiat tawh avanga bungraw senghawi leh thil dang tul atana sum mamawh ruahman fel dan te, District tin Deputy Commissioner te hnena State Disaster Response Fund pek dan chungchang te leh 14th Finance Commission hnena sum mamawh tur dil chungchang te an rel a, SDRF hmanga hmanrua lei chungchang leh Capacity Building Grant hnuaia Annual Work Plan 2013-2014 ruahmanna leh National School Safety Programme (NSSP) Work Plan chungchang te an sawiho bawk.

He Committee ah hian Finance Secretary, Home Secretary, E-in-C, PWD te member niin DM&R Secretary chu Member Secretary a ni.