2887/2025-2026
Aizawl dated 13th January 2026: Vawiin khan Mizoram Legislative Assembly Conference Hall-ah National Disaster Management Authority leh Disaster Management & Rehabilitation Department tangkawp buatsaihin, Mizorama chhiatrupna thleng thei hrang hrang laka chhanchhuah leh chhawmdawl hna sawt leh awmze nei zawka kalpui dan tur sawi hona, 'Table Top Exercise' neih a ni a. He hun hi Pu Udit Prakash Rai, Commissioner & Secretary, DM&R chuan kaihruaiin kalkhawmte lawmna thu a sawi a. Brig. Ravinder Gurung (Rtd.), Sr. Consultant, NDMA chuan 'Table Top Exercise' awmzia leh a pawimawhna sawifiahna hun hmangin he hunah hian Mizoram District hrang hranga District Disaster Management Authority, Mizoram Police, Incident Response Team leh Nodal Department aiawhte an tel a ni.
January ni 15-a State Level Mock Exercise kalpuina tura vawiina Table Top Exercise neih ah hian Pu Lalbiakfela, Deputy Director, DM&R chuan Mizoram State Disaster Plan sawifiahna hun a hmang a. Prof. Saitluanga, Department of Geology, Pachhunga University chuan Mizorama lirnghing thlen dan leh lirnghing thlen hlauhawmna hmun thenkhat tarlanna hun a hmang a. State Disaster Relief Force dinhmun leh an chetlakna tura hmanrua an neih dan dinhmunte chu Pu Lalpianfela, Addl. SP chuan tarlangin Dr. Lalrokima Chenkual, Deputy Director, DM&R chuan chhanchhuah leh chhawmdawl hna thawk tura khawtlang leh tlawmngai pawlte nen thawhhona an kalpui dan a sawi bawk a ni. Pi Margaret Lalrinawmi Fanai, Joint Director, Transport chuan lirthei chetsualna thleng thei laka inven dan leh hriattur pawimawh hrang hrang sawizauna hun a hmang a, Mizoram chhunga Industry hmun hrang hranga chhiatrupna thlen palha chhanchhuah leh chhawmdawl hna kalpui dan tur ruahmanna chu Pu Lalrinawma, Joint Director, Commerce & Industries Department chuan Powerpoint hmangin presentation a pe bawk a ni.
He huna tarlan danin chhiatrupna thlen palha che chhuak thei tur, State Disaster Response Force chu Mizoram Police hnuaia Armed Battalion 8 atangin mi 546 an awm a. Aapda Mitra Scheme 2022 -23 kalpuina hnuaiah district 5 atangin mi 100 theuh hnenah training pek an ni a. Yuva Aapda Mitra 2024 - 26 kalpui mekah mi 419 traning pek ni tawhin NCC, NSS, NYK leh Bharat Scout & Guide hnuaia a tul anga che chhuak thei tur thalai mi 1130 ziah luh tawh a nih thu ngaihthlak a ni a. Sairang leh Tlabungah tawmhimna 'Safe Shelter' pahnih sak a nih thu tarlan a ni.
Brig. Ravinder Gurung (Retd.), Sr. Consultant, NDMA chuan Table Top Excercise chu kaihruaiin, kum 10 chhung khan Aizawl leh a chhevel km 300 bial chhungah lirnghing magnitude 4 aia na, tum 520 chhinchhiah a nih thu a sawi a. He mi chhung hian kum 2020 kha lirnghing tam ber kum a nih thu sawiin tum 75 chhinchhiah a nih thu a sawi.
Pi Zarzokimi, Joint Secretary, DM&R, Pu Chuauhnuna, Director leh Brig. Pushpendra Surian, Commander, 23 Sector, Assam rifles ten he hun hi an telpui a ni.
