Disaster Management & Rehabilitation Department leh District Disaster Management Authority, Mamit tangkawp chuan vawiin khan “Disaster Management” chungchanga inzirtirna LAD Conference Hall-ah leh Govt. Mamit High School-ah neih a ni.

LAD Conference Hall-ah hian Mamit khawchunga Gazetted Officer awm te leh office tina disaster managemenr plan buaipuitu staff te tan leh khawtlanghruaitute tan zirtirna buatsaih a ni a. Chawhma hunah hian Sorkar official te zirtirna pek niin, he hun hi Pu Vanlalhmachhuana, SDC Mamit chuan a kaihruai a, Pi Lalbiaksangi, Deputy Commissioner leh DDMA Chairman Mamit ni bawk chu khuallian a ni a. He hunah hian Department tin te’n chhiatrupna thlen thuta an hmalak dan tur an ruahman te leh IRS hmalakna turte zirho a ni a. Chawhnu lamah hian khawtlang hruaitute leh tlawmngai pawlte zirtirna pek an ni thung a. He hunah hian Village Disaster MAnagement Committee din dan tur leh Village Disaster Management Plan siam dan tur te zirtirna pe in sawiho a ni. Dr. Lalrokima Chenkual, Head Faculty ATI leh Zothansanga Hmar, District Organiser, Aizawl ten zirtirna an pe a ni.

Govt. Mamit High School-ah hian Mamit khawchhungah High School leh Higher Secondary School a zirlai leh zirtirtute tan zirtirna buatsaih a ni bawk a. He hun hi Pi JH Lalparmawii, DIPRO chuan kaihruaiin Zirna In himna chungchang leh hliam enkawl dan tur bakah chhiatrupna a thlena awmdan tur ah te Dr. P.C.Lalawmpuia, M.O, Inspector H.Lalramnghaka SDRF,4th IR Bn., Chuaupari Pachuau, District Organiser Serchhip leh Zothansanga Hmar, District Organiser Aizawl ten zirtirna an pe a ni.

Naktuk 30th October, 2015 hian chawhma dar 10:00 hian Govt. Mamit High School-ah leh SSA Office, Mamit-ah Mock Drill neih a ni dawn a. Vawiinah trainin-ah hian Department hrang hrang te leh tlawmngai pawlte mawhphurhna tur inhrilhhriatnahun neih a ni bawk.