Chhim lam khua fanga thang mek, Chief Minister Pu Lal Thanhawla chuan nizan khan Sangau atangin Saiha a thleng a. Sangau leh Saiha inkara khaw mipui ten an phak tawk angin,ropui taka lo hmuakin an lo lawm a ni. Chief Minister hi Sangau-a a cham chhungin Phawngpui National Park a Far Park thleng a tlawh a ni.

Chief Minister chuan Mizorama chengte hi a leilung fa te vek kan ni a, kan awmnate a danglam avangin kan khawsakziate leh tawngte a danglam mai a ni a ti a. Chuvangin chanvo kan neihte leh dikna kan neihte hi a inang vek a, neitu rilru pu a piang a neitu kan ni mai a ni a ti. Hmasawnna chungchang a sawiah, Chief Minister chuan rualkhai taka Mizoramin hma a sawn hi a duh ber a ni tiin, mimal emaw a khaw bik emaw angin tumah duhsak bik leh tih sak neih a duhlo a ni a ti a, Mamawh leh dil an neih te chu tih puitlin sak turin hun leh sum in ala daih lo a ni a ti. Khaw mipuite chu mikhual anga kal lovin, neitu nihna rilru pu chunga kal turin a chah a ni.

Chief Minister chuan Mizoram mipui ten rualkhai taka lei rem an rah hi a tum ber ani tiin, a thil tum ber, NLUP changtlung zawk hmanga mirethei, pachhia, hmeithaite leh loneitu kuthnathawktute retheihna ata khaichhuaka, tuchhuan thlenga eizawnna ngialnghet siam sak a ni a ti a. A hlawhtlin ngei theih nan line departmenta a viltu turte leh a dawngtu turte kum hnih chhung buatsaih nan hman a ni a ti a. A hlawhtlinna tak erawhchu a dawngtu te kutah a awm a ni a ti a. Chuvangin taimakna, rinawmna, tumruhna leh Pathian tihna nen kalpui angai a ni a ti. Kan hnathawh theuh hi Pathian rawng kan bawlna anih avangin tui takin kan thawk tur a ni a, chu chu a hlawhtlinna bul a ni a ti.

Chief Minister chuan kum 5 chhung atan NLUP dawng tur chhungkua 1,20,000 hnenah pek tur anih thu sawiin. tunah hian a thawh hnihna atan chhungkua 90,000 pek mek a i a ti a, A bak zawng chu kum 2013 hma in pek kim vek tur an ni a ti a, sum pawhin a daih vek ang a ti a ni. Hetih laia NLUP sawisel leh sawichhetu ten au au mahse, NLUP chu kal muah muah tho dawn a ni a ti.

Chief Minister hi Pu H.Zothangliana, Parliamentary Secretary, Pu R.Lalrinawma, Chairman, Law Commission leh Pu T.T. Zothansanga, MLA te leh Lai Autonomous District Council hotu ten an tawiawm a ni.