Kolasib District huam chhunga Chhimluang khua leh Vairengte inkarah dan phalloa sak kudam 20 chuang a awm tih hmuchhuah a ni.

Vawiin khan Kolasib Bawrhsap Pu Zoengsanga chuan NH-54 a (Vairengte kawng) truck ding thin ten zin veivak mi te tana harsatna an siam te endikin a hmunah kalin thil nih phung a zirchiang a he kawng enfiah na ah hian Highway Jam thlen nachhan ber chu kawngpui kama Sumdawng motor tam lutuk thin vang niin, heng Motor lian te hian Champhai lam atangin state pawna sumdawngte hnena pek tur Kuhva leh Phai lam atanga champhai kaltlanga Burma lama phurh luh tur leitha (urea) te inthleng tawnna hmun atana hman anih vang niin alang.

Helai kawngpui kamah hian a ram neitu mimal thenkhatin Godown sa in sumdawng te hian Kuhva leh Leitha chhekkhawm nan manchawiin an luah hawh thin ani.

Hetianga sumdawng motor lian tamtak awmkhawm thin hian Highway traffic Jam a thlen thin avang leh helai hmunah hian dan lova warehouse 20 chuang lai sak anih avangin DC thupekin Warehouse te hi kalhsak anni a, heibakah hian sumdawnna bungrua Leitha leh Kuhva te hi dan anga kalpui an nih leh nih loh fiahna document hmuh tur a awm loh avangin man vek ani bawk.

Bawrhsap Pu Zoengsanga chuan heng kuhva rah leh urea dahkhawmna hmun kudam hi The Warehouse (Development and Regulation) Act kalh anih thu a sawi a, mahni ram chhung ah pawh nise kudam sa turin sak phalna lak hmasak a ngaih thu a tarlang a, kudam luah hawhtu te chuan dan phalna hnuaiah sumdawnna an kalpui em tih te pawh Ram neituten an vil uluk a ngai ani ati, hemi bakah hian urea leh kuhva Rah lakluh/ thawnchhuah te hi dan phalna hnuaia kalpui ani em tih finfiah turin lehkha (documents) hmuh tur a awmloa, kudam neitu te hnenah show cause notice pek an ni anga, District Administration phalna leh hriatpuina telloin kudam hi hawn loh tur ani . Kudam dang awm te chu naktukah Vairengte SDO(C) leh Vairengte SDPO ten an en zui dawn a ni.

Bawrhsap hi Kolasib SP Pu Vanlalfaka Ralte, Kolasib DAO Pu J.Rothanga, Official dang bakah Kolasib District chanchinbu mi ten an tawiawm a ni.