Nimin khan Tuikum bialtu MLA leh Mizoram KVI Board Chairman ni bawk, Pu K. Lianzuala chuan khan Chhingchhip leh Tlungvel-ah te Tuikum Cluster huamchhunga Agriculture Department, Horticulture Department leh Soil & Water Conservation Department hnuaia NLUP 2nd Phase dawng te hnenah tanpuina sum a semchhuak.

NLUP 2nd Phase tanpuina semna inkhawm Nimin chawhma lama Chhingchhip-a Chhingpuii Run-a neih ah hian Mizoram KVI Board Chairman leh District Level NLUP Monitoring Committee-a Chairman ni bawk, Pu K. Lianzuala, MLA chuan eizawnna kawnga leirem rap tawhlo leh pachhia te tana NLUP tanpuina semchhuah mek a ni chu lawmawm a tih thu a sawi a, hemi kawnga Serchhip District-a NLUP Cell leh Line Department te hnathawh chu lawmawm a tih thu sawiin, Mizoram sorkar chuan a policy tih hlawhtlinna atan NLUP a sem mek chu a sem chhunzawm zel dawn tih a sawi a, NLUP chu mipui Policy a nih thu sawiin, Congress kaihhruai sorkar hmasa pawhin a lo sem tawh thu leh tunah hian a aia changtlung zawka siamin sem chhunzawm mek a nih thu sawiin, inthlan dawn a nih vang chauha sem an nih loh thu a sawi a, NLUP hlawhtlinna atan a dawngtute an pawimawhna sawiin, Party thlan bik awm lovin sem a nih thu leh NLUP tanpuina an dawn avanga thatchhiatna thleng thei te do tlat turin beneficiary te a chah a. NLUP chu eizawnna ngelnghet an neih theihna tur leh ei leh bar-a intodelhna tur a nih thu sawiin, Tuikum Cluster huamchhung ami te chu NLUP hmasa ah pawh a ti hlawhtling tha ber berte zing a mi nia a hriat thu leh tun thlengin a hlawhtlinna chu an la chhawr ni a a hrtiat thu a sawi bawk.

Hei bakah hian Tuikum bialtu MLA ni bawk, Pu K. Lianzuala chuan tun sorkar kal mek chhunga a bial chhunga hmasawnna thleng thenkhat te pawh tarlangin; PHE Department hnuaiah khaw hrang hrangah mipui tui in tur pekna atan Tuizem lian siam mek a nih bakah; siam tura hna tan mai theih engemaw zat a awm thu sawiin, Tlungvel-ah PHE Sub-Division hawn a nih tur thu a sawi bawk a, Education Department hnuaiah RMSA sum hmangin khaw 7-ah High School din a nih tawh thu leh building tha tak nen hawn a nih tawh thu a sawi a, tunah hian a dang pahnih din tum leh mek a nih thu sawiin, Polytechnic pawh Chhiahtlang-ah din a nih dawn thu leh cheng vbc. 2 ruahman fel a nih tawh thu a sawi a, Health Sub-Centre 5 sa tawhin 1 pawh sak mek a nih thu a sawi bawk.

Vawiin a heng khaw pahnih a NLUP tanpuina semna hunah hian Agriculture Department hnuaia khaw 10-a chhungkaw 134 te hnenah NLUP 2nd Phase tanpuina 2nd Instalment semchhuah niin chhungkaw 9 te chu an hmalakna enfiah tur ala nih avangin tanpuina hi pekchhuah an la ni lo thung a. Horticulture Department hnuaia khaw 10-a chhungkaw 150 te hnenah leh Soil & Water Conservation Department hnuaia khaw 8-a chhungkaw 110 te hnenah NLUP 2nd Phase tanpuina hi Pu K. Lianzuala chuan a sem bawk a ni.

Vawiin a heng khaw pahnih a NLUP semna inkhawm ah hian Pu Robert C. Lalhmangaiha, MCS, Nodal Officer, NLUP Serchhip District pawhin thu a sawi bawk a; Chawhnu lamah Pu K. Lianzuala hian Tlungvel-ah NLUP 2nd Phase tanpuina hi a sem leh bawk a ni.