Chhumkhum to Chawngte Road hi World Bank Funded Project, Mizoram State Roads II, Regional Transport Connectivity hnuaiah Highway 2-Lane tur a siam mek a ni a. JKM Infra Projects Limited, Noida (U.P) in December 2014 atang khan he hna hi an thawk tan a, kum 4 chhunga zawh tur a ni a. Tunah hian 24km vel laih tawh niin hmun engemaw zatah culvert leh retaining wall siam mek a ni.
Chhumkhum to Chawngte kawng hi kum 2006 khan World Bank sum hmanga maintenance thawh a ni a. A kawngin a paltlang hmun thenkhat Sahramzel (Rangte leh Lalnutui inkarah), Panhnah huan (Rualalung leh Chawngte inkarah) leh Chawngte khaw bul Teak huan chhuk hi dam leh leidup hnawng tak anih avangin blacktop a chhe tawh a. Rualalung leh Chawngte inkar hmun tam takah kawng a awih lutuk avangin erosion in kawng a eichhe nasa hle bawk a. Heng hmun hi kumtin fur laiin motor kal harsatna a ni thin. Kum 2015 khan Contractor hian Rualalung leh Chawngte inkar chhe lai hi lung phahin a siamtha a ni.
Kum 2016 fur a lo thlenin Sahramzel leh Panhnahhuan lai hi kawngchhe lai a ni leh a. Sub-Contractor ruaiin Sahramzel leh Panhnahhuan leh hmun thenkhat diak zual chu November- December 2016 chhungin lung phah chhuah vek a ni a. Kumin 2017 chuan helaiah hian harsatna a awm hriat a ni lo.
Kumin lamah kawngchhe zual lai, Lungrang- Rualalung- Chawngte ah te lung phah leh a ni a. Thal chhunga lung phah hmanlohna lai Chawngte khaw luh dawn 46kmp to 47.3kmp hi nasa taka diak lehin June ni 12 atang phei chuan Sumo pawh a service thei ta lo a. Heng bakah hian kawng laih thar, GSB la phah loh 2+200 to 2+600, 8+100 to 8+400, 9+900 to 10+000, 25+500, 26+400 to 26+700 ah te diak nasa tak insiamin June thla atangin motor kal hleih theih a ni loa. Heng hmuna motor tang reng reng chu contractor-in JCB/excavator hmangin a hnuhchhuah zel a ngai ta a. Contractor pui tur hian September 2017 atangin PWD-in direct-in sub-contractor John Sapdinpuia Halliday chu a la a ni.
Sub-Contractor hian JCB pathum, Hitachi pathum leh Labour tam tak ruaiin hma ala nghala, September 15, 2017 atangin sumo pawh a service leh thei ta a ni. Tun dinhmunah Rangte- Lalnutui-Lungrang S leh Rualalung inkar diak zualpui laiah lung phah a ni tawh a, Rualalung leh Chawngte inkar hi lung supply duh anga tha hmuh anih loh avangin khawih hleih theih ala ni lo. Chhumkhum to Chawngte Road hi October 20, 2017 hma in Truck kal thei tura siam hman tum a ni a, hemi atan hian Contractor leh sub-Contractor ten kawngchhe siamthat hna hi an thawk mek a ni.
