Vawiin chawhma dar 11:00 khan Pu John Siamkunga, MLA Chairman Mizoram State Law Commission chuan a bial South Tuipui chhunga Model Village atana a thlan S. Vanlaiphai Model Village hawnna hun hmanpuiin Lungphun a hawng a ni.

Pu John Siamkunga chuan, a bial chhung khaw 16 atanga Model Village atana thlanchhuah an ni chu S. Vanlaiphai tan chuan ni chhinchiah thlak tak a ni a, hriat tur pawimawh em em chu Model Village nih avang hian a tirah development lut phut phut tura ngaih tur a ni lova, a hmasa berah rilru lam buatsaih in, changkanna lam pang a tinzawn hmasak phawt a ngai a ni a ti a, mahni rilru leh thinlung lama changkanna a awm loh chuan engang thil hlu pawh hi dah ila, ngaihsak lohvin kan hluihlawn leh mai thin a, rilru siam rem phawt a ngai dawn a, chumi ti tur chuan line department te an inbuatsaih chho zel a ni a ti.

Pu John-a chuan Model Village-a school naupangte pawh thianghlimna leh faina kawnga tan la turin a chah a, bawlhhlawh leh ekin te tih fai viau chuan changkanna a lan tir a, zirna lamah pawh a chhiar leh ziak thiam a, chhawr tlak ni ngei tura tanlak a ngai a ni a ti. Engang thil hlu pawh hi nei in kan bialah rawn dah mahse chhungril lama puitlinna kan neih loh chuan a tawngtawl ral mai mai ang tih a hlauhawm tiin a bial road map fel tak nen hma an lak thin thu sawiin kar lovah an bial chuan hma a sawn ngei a beisei thu a sawi.a ti bawk.