Ni thum chhung a thangchhuah hnu-in Chief Minister Pu Lal Thanhawla chu vawiin khan dam takin Aizawl alo thleng leh ta. Tarlan tawh angin, nilaini ni 24 February khan Serchhipah Chief Minister hian Agriculture Exhibition a hawng a. Nimin khan a bial chhunga Neihloh leh Buangpui khuate tlawhin vawiin khan Thenzawl atangin Aizawl a lo thleng leh a ni.

 

 

Nimina Neihlon leh Buangpui khuate a tlawhnaah Pu Lal Thanhawla chuan Mizorama kuthnathawktu, lo neiha eizawngte chu NLUP hmangin eizawnna tluantling, an tuchhuante thleng pawh ina eizawn nana an rawn hman chhoh zel tur chu sorkarin rahbi tuksakin, a siam sak dawn a ni a ti a. Hemi atana pawimawh tur ram an neihte chu humhalh tlat a, ti riral mai mai lo turin a chah a. N LUP hi central lama mithiamte pawhin tha an tih avangin a hlawhtlin ngei ngei na turin uluk taka min enpui avangin a kalpui zung zung theih loh a ni a ti a. Kan hlawhtlinpui phawt chuan India ramah hman ve an tum a ni a ti. Hetiang anih avang hian kan thlai leh theite rawn hmang tangkaia, lakkhuihthei, sapthei leh grape tui te a concentrate a an sawr theih nan a tul tur ang khawlte pawh USA a company pakhat chuan rawn inbun a inpeih thu a sawi a. Amaherawhchu, an mamawh tur lakhuihthei chu kum khatah metric tonne nuai 4 leh singnga vel anuh dawn avangin kan ti thei ang em tih sorkar a inngaihtuah mek thu a sawi a. Chuvangin hetiang tharchhuak thei tur chuan ram zau tak mamawh anih tur thu sawiin, hetiang lam hawi hian mipuite chuan ngaihtuahna lo seng turin a chah a. NLUP hnuaia ar vulh emaw vawk vulh emaw tumtu te hnenah chuan tanpui sorkarin a tum loh thu sawilangin, ar farm emaw vawk farm emaw, ram bihga 2-3 emaw tala zauah din an duh chuan phur takin sorkar chuan NLUP hmangin bul a tan pui ang a ti.Chutiang bawkin thei leh thlai tam tham tak ching duh turte chu tanpui a inhuam bawk a ni a ti.

Chief Minister hian khaw mi ten an dil angin, inhlawhna an neih theih nan a MLA Fund atangin Rs.70,000/- a pe a ni. Tukin zing khan Thenzawl leh Haulawng inkara Mizoram Sports Couincil buatsaih, 4th Mizoram Marathon Race ( 42 Km ) for Men leh 1st Mizoram Marathon (21 Km) for Women intihsiaka a chak ber 3 ve ve te hnenah lawmman Thenzawl Fieldah Chief Minister hian semna a nei a. Thutawi sawiin, Pu Hawla chuan zuk leh hmuam ti thinte leh ruihtheih thila fihlimlo te chuan heiang intihsiakna hi an tlin ve ngailo a ni a ti a.Chuvangin infiammi te chu zuk leh hmuam bakah ruihtheih thila fihlim tura chah nawnin, an infiam chhung mai nilo, an nun kal chho zelah sportsman spirit dik tak nunpui zel turin a fuih thar bawk a ni.

Serchhipa Agricuture Exhibition neih mek chu vawiin khan Pu K.S.Thanga, Parliamentary Secretrary in kharin, Chief Minister nupui Pi Lalriliani’n lawmman dawngtute hnenah lawmman hi a hlan a ni. Lawmman hi pakhatna cheng 1000, Pahnihna cheng 700 leh pathumna cheng 500 a ni a. Hei bakah hian Agri, Vety. leh Sericulture Deptt. atanga Farmer tithate hnenah lawmman pakhatna cheng 6000, pahnihna cheng 4000, pathumna cheng 2500 theuh a hlan bawk a. Heng bakah hian NWDPRA leh WDPSCA Project hnuaia tithate hnenah lawmman pakhatna cheng 11,000, pahnihna cheng 8000 leh pathumna cheng 6000 leh Consolation Prize pakhat hnenah cheng 1250 a hlan bawk a ni.