No.60/2020-2021

Chief Minister Pu Zoramthanga hmalaknaa thingtlang atanga thlaite Aizawla hralh tura ruahmanna siam Vegetable Supply Chain chu tangkai taka hman mek a ni a. Hei aia tangkai zawka mipuiin an chhawr theihna turin mi tlawmngai inpe Aizawla Local Level Task Force hrang hrangte tan la lehzual turin Information & Public Relations Minister Pu Lalruatkima chuan a ngen.

He Vegetable Supply Chain hi tangkai taka kalpui niin, thlai tharte hi Aizawlah tum hnih phurh thlen tawh a ni a. Thlai kan mamawh chu kan tharchhuak ve a ni tih pawh he hmalakna hian a lantir niin a hriat theih a. Hetihrual hian lockdown hlih hma ni 10 chuang lai la awm tur a nih avang leh, kan dinhmun zel tur hriat lawk theih a nih loh avangin mipuite chu thil engkimah inrenchem nachang hre turin Minister Pu Lalruatkima chuan a chah a. Hospital te, Hostel, Jail leh institution dang, a hlawm anga mamawh neite pawhin ngaihven tura a duh thu Minister chuan a sawi a ni.

Vegetable Supply Chain hi Horticulture changtu Additional Chief Secretary Pu JC Ramthanga kaihhruaia committee din chuan a kalphung tur duangin, Horticulture Department, MIZOFED leh Commerce & Industries Department te tanghovin hma an la a. Tun Inrinni hian thlai leh thei rah te chah thlen leh tum a ni a, veng tin LLTF te chu ngaihven tura beisei an ni

Mizo kuthnathawktute thlai thar hi thil chhe awlsam a nih avangin a rang lama hralh zung zung ngai a ni a. Tunlai kan hun tawng mekah hetiang ang thlai thar keimahni thawhchhuah ngei ei tur kan hmu thei hi thil lawmawm tak a ni a, hun harsa khuahkhirhna hnuaia kan awm laia thlai hring ei tur kan la nei thei hi a hlu takzet a ni. Khuahkhirhna hnuaiah mipui tan lei tura chhuah a rem si lova, chuvangin a mamawhtu chhungkuate hnen a thlen ngei theih nan a lei thei tura ruat LLTF leh institution te pawhin tan an lak a ngai niin a buaipuitu Horticulture, C&I leh MIZOFED te chuan an sawi a ni.