Nimin khan Cancer Foundation of India (CFI) Kolkata ten Aizawl District (Notified Territory) huamchhunga Human Papilloma Virus (HPV) Vaccination, Demonstration Project anga kalpuina tur atana ruahmanna an duan lailawk chin chu Chief Minister Pu Lal Thanhawla hrilhin, power point presentation hmangin he Demonstration Project ina a tum, a huam chin tur leh kalpui an tum dante leh hemi atana Health Department leh Mizoram Sawrkar puihna an mamawh dante an sawifiah a. He presentation, Chief Minister’s Office-a neihah hian Health Minister Pu Lal Thanzara; Indian Society on Tobacco & Health (Mizoram Chapter) President Pi Lal Riliani; Health & Family Welfare Department Commissioner Pu Lalrinliana Fanai bakah Health & Family Welfare Department hotulu leh mithiamte leh Social Welfare Department leh School Education Department te an tel bawk a ni.

Cancer Foundation of India, Kolkata, Founder Chairman, Prof Maqsood Siddiqi leh a thawhpui CFI Executive Director Pi Sutapa Biswas te chuan he Demonstration Project in a tum, an huam chin tur, a hlawknate leh kalpui tum dante an presentation ah hian a tarlang a. Human Papilloma Virus hi cervical cancer (chhulhmawr cancer) thlentu ber anih thute leh HPV laka hri danna lak in cervical cancer a ven theih thute an sawi a. He project hi Sikkim, Mizoram, Andhra Pradesh leh Tamil Nadu a kalpui turah an buk hnuin Mizoram chu tunhma atanga cancer chungchanga an lo thawhpui avangin leh cancer hluarna state anih avangtein Mizoramah he project hi kalpui turin thu an tih tluk thu te pawh an sawi a. Mizoram in vaihlo laka beihpui a thlak dan hi state dangte khaikhinin heti khawpa hlawhtling hi an la awm lo nia an hriat thu te an sawilang bawk.

Mithiam te presentation a ngaihthlak hnuin Chief Minister Pu Lal Thanhawla chuan CFI in HPV Vaccination atana Demonstration Project an duan chin chu tha tiin hemi Project hi kalpui anih ngei theih nan kawng engkimah Mizoram Sawrkar chuan CFI pui tur leh a tawiawm tur thu a sawi a. He project hian hmeichhe tleirawl an puitlin hnua cervical cancer laka a ven theih avangin hmeichhiate tan thil lawmawm tak an hriselna atan pawh thil tha tak nia a hriat thu sawiin he project hi kalpui tha a tih thu a sawi.

Human Papilloma Virus (HPV) hi hmeichhiate zinga chhul hmawr cancer cervical cancer thlentu ber a niin cervical cancer za zelah 97 hi HPV avanga awm a ni. He cancer laka inven theih dan chu HPV hri danna (vaccination) lak hi a ni a. HPV vaccine hi India Sawrkar immunization programme in a huam lova private hospital ah te chiah lak tur a la awm a. He Project hian Aizawl District (NT) huam chhunga hmeichhe 20,000 vel (kum 9 lehkum 13 inkar) a thlawnin HPV hridanna pek a tum dawn a ni.

Khawvela cervical cancer hmuh chhuah za zelah 23 chu India mi te niin India hmeichhiate zinga cancer hluar ber dawttu a ni a. Mizoramah pawh hmeichhia te zinga cancer hluar pawl a ni.

Kum 2009 khan CFI hian WHO project hnuaia India ram puma hmeichhe naupang 17,000 vel chu a enchhin nan he vaccine dose hnih theuh an pe a, heng zinga 500 chu Mizoram naupangte an ni a, tunah hian an hriselna dinhmun te hi enzui leh vilzui reng an ni.

HPV Vaccination hi khawvel ram 66 ah Sawrkar immunization programme a telh niin Bhutan pawhin an immunization programme ah an telh a ni.