No.3468/2021-2022

Aizawl the 20th December, 2021: Chief Minister Pu Zoramthanga hovin vawiin chawhma khan Bamboo Development Board leh Bamboo Link Road Board te chu CM Conference Hall-ah joint meeting an nei.

He meeting-ah hian mau leh rua hmanga ei leh bara state tihhmasawn kawnga pawimawh em em pakhat, link road siam chungchang sawiho a ni a. Mau thahnem tak awm mahse processing plant thlenga phur turin kawng mumal a awmloh avanga mau hralh man aia phurh man a tam zawk thin avangin mau hralhtute tan a hlawklo in, processing plant lamin a tuar phah bawk thin a. Heng harsatnate hi sukiang turin sawrkar laipuia thuneitute chu Chief Minister leh Planning department hotulu te'n bamboo link road siam a tulna te an lo sawipui tawh a. Sawrkar laipui pawhin bamboo link road siam tura project duang turin leh, sum pekna tur pawh ngaihtuah ho zui tur a nih thu an sawi a ni.

Bamboo Link road siamna tur hi board member te chu group a insiamin hmun hrang hrang an lo thlithlai tawh a. Vawiin meeting-ah hian report pe in, pilot project atana hmalak hmasak theihna tur remchang a langte an sawiho a. Bawhzui zel turin Bamboo Development Board leh Bamboo Link Road Board member te ve ve atangin pawl a insiamin, ruahmanna ngaihtuah zui ni se tia rel a ni.

Vawiin meeting-ah hian Dr. K. Pachhunga, Bamboo Development Board Vice Chairman; Er. K. Lalsawmvela, Adviser to CM (Technical); Pu J.C Ramthanga, Addl. Chief Secretary to Chief Minister; Pu Lalmalsawma Pachuau, Planning Secretary; Dr. E. Saipari, Director, Horticulture Dept. leh board member dangte an tel a ni.