Chief Minister Pu Lal Thanhawla hoin vawiin khan a office cabinet room-ah Mizoram Science & Technology Council Meeting neih a ni.

Chief Minister chuan Science & Technology Council hi kum 1971 a central sorkar in a din atangin state tam zawk chuan an nei tawh a, keini hi a hnuhnung pawl kan ni mai awm e a ti a. A tum ber pawh science leh technology tih lar leh chawisan a ni a ti a. Mizote hi tun hma chuan science leh mathematics hi kan zuam loh thin avangin kan hnufum bik thin a ni tiin, tunlaiah chuan thalai tam tak science leh mathematicsa thiam tak tak kan awm ta hi a lawmawm hle a ni a ti a. Chuvangin mipui ah kan vawrh lar chhoh zel a tul hle a ni a ti. Chief Minister chuan kan kristianna hian min ti changkang nia a hriatthu sawiin, state dangah chuan ramhuai hnathawh (witchcraft) la buaipui an awm a, chuvangin hmasawn chak ber tur awm pawh kan ni a ti a. National Science & Technology Council hi kum 2013 khan National Science, Technology & Innovation tia thlak a nih thu a sawi a. Thil thar kan hmuhchhuahte hi kan remtihna leh phalna lo chuan midangin an hman ve mai thei laka kan invenna turin ‘patent’ tir thin a pawimawh takzet a ni a ti a, kan puantah te hi patent vek ngai a ni a ti. Chutilochu kan ta a nilo mai ang tih a hlauhawm a ni a ti. Thil thar hmuhchhuah lamah leh science leh technology lam tih hmasawn nan a tih phurna ‘incentive’ siam te hi a pawimawh hle a ni a ti.

Meeting-ah hian science & technology lama Mizoramin hmasawnna a neih theihna turin sawiho tur agenda pasarih vel chhawpchhuah a ni a. Chung zingah chuan Mizoram Science & Technology Council hmalak tawhna te powerpoint hmangin Dr. Vanlalzara, Member Secretary in a nei a.Zirna Ina science laboratory tih lar leh enkawl dan chungchangte sawiho a ni a, industry leh science lama tui mite intawhkhawm siam a kan thil thar siam leh hmuhchhuah tharte chawisan leh sum chang theia siam dan te an sawiho bawk a. District tina District Level Science Centre hawn te, Ruahtui dah khawlna tura a hmanruate tlangzarh theihna tura Nodal Centre din chungchangte leh Council hi Societies Registration Act, 2005 hnuaia in register chungchangte an sawiho bawk a ni.

Mizoram Science & Tehnology Council hi kum 1984 a din a ni a, a tul ang zelin siam thar thin a ni. Tuna Council pawh hi nikum 2014, November thla a siam thar a ni.

Council-ah hian Chief Minister chu Chairman a ni a, Planning Minister chu Vice Chairman a ni a. Member Secretary chu Chief Scientific Officer, Directorate of Science & Technology, Planning Department a ni. An ni bakah hian member dang 12 an awm bawk a ni.