Mizoram State Health Care Society (MSHCS) chuan vawiin khan Chief Minister Office cabinet room-ah Chief Minister Pu Lal Thanhawla hoin General Meeting vawi 12-na an nei.

Meeting-ah hian thurel tur engemawzah chhawpchhuah a ni a. RSBY leh MNREGA a inziaklutte hi a thar ber leh dik ber a awm theihna turin village council emaw local council leh Health Workerte hnen atanga hming inziaklutte khawn nise an ti a. RSBY sum hi central leh state sorkarin 90 : 10 ratio a kalpui thina, state sorkarin a sum sanction hi a tlem thin avangin tihpun nise an ti bawk a. MSHCS hnuaia hnathawkte hlawh hi Corpus Fund-a a pung awm (interest) atanga pek thin an ni a. Hemi bakah inrelbawna tur sum a hranpa a dah nise tiin, operational costs atan Rs. 55 lakhs rawtna chu remtih a ni. Hengte bakah hian hnathawkte hlawh hi NRHM hnuaia an zawlpui hnathawkte nen hlawh thuhmun an hmuh ve naturinan hlawh chu tihpun ve remtih a ni bawk a. Tuna policy kalpui mek hi kumin 2013 December thlaa tawp tur anih avangin March 2014 thleng pawhsei nise tiin an pawm bawk a ni. RSBY bikah chuan nakum January 2014 atanga march thla thleng khian Insurance Company atanga sum pek tur chinfel nan hmanga, chutih chhungin a policy hi tihtawp lailawk mai nise an ti bawk a ni.