Chief Minister Pu Lal Thanhawla hoin vawiin khan a office conference roomah sum renchem chungchang Ministers, Parliamentaries leh MLA ten an sawiho.

Thuhma a sawiah Chief Minister chuan sorkarin tluang taka kum khat chhung an hmang zo thei chu lawmawm a tihthu a sawi a.Kumin kum tharah pawh tang tlang leh tura sorkar hotute chu sawmin tuna an koh khawm chhan ber chu hna thawh dan thar leh inbihchian dan turte, a bikin sum lama inrenchem dan tur sawiho a ni a ti a. Thupui atan “sum renchem’ nise tiin, engtinnge sum tam zawk kan lakluh theih ang tih sawihoa, hetah hian thutlukna khauh tak (hard decision) lak angaihna laite a awm thei a ni a ti a.Sum lama harsatna hi Indian economy tlakhniam atang khan ngai ala awh tak tak theilo tiin, Pu Hawla chuan kum 2008 a an sorkar tan atang khan leiba cheng vaibelchhe sangthum chuang an rochun a, 13th Finance Commisiionin non plan revenue expenditure ah kan mamawh aia tlem fe an dah a - cheng vaibelchhe 13116.85 kan mamawh laiin cheng vaibelchhe 9442.89 chauh min pe a ni a ti a. Heng bakah 6th Central Pay Scale kan hman avangte, college zirtirtute hlawh UGC pay scales a kalpui vang te leh subsidy kalpui vang tein sumah kan harsat phah hle a ni a ti.

Buhfai man tihsan thuah Chief Minister chuan India pumah Mizoram chu buhfai man tlawm berna a ni tiin, tihsan thut anih loh thu leh a man tur ang pek tir mai a ni zawk a ni a ti a. Thutlukna khauh siam ngaih laite a awm avangin MLPC pawh hman tura kalpui a ni tiin, sum um vang a nilo a ti a. Chutiangin VIP quota buhfai pawh tihbo tha tih vang a ni a ti. Chief Minister chuan kalkhawmte chu a neitu vek an nih angin thu kal leh haw lam hriat tlan vek hi a tha a ni a ti.

Meeting-a an sawiho hrang hrang zingah sum sen tlem zawk nan leh bungraw tha lei theih nan department tin ten ‘C’ form hmangin bungrua lei nise, department kenkawhna dan leh hrai te hi a officer ten hneh takin hria se, sorkarin mimal in luah loh theih dan dap se, bungraw lei chungchangah write off tur leh mamawh aia tam lei loh te, Comptroller & Auditor General of India observations ngaih pawimawh te, department dangte mamawh dan azira department ram hman phal tir te, medical reimbursement dan ennawn te, bungraw lei chungchanga fimkhur te, court case ngaih pawimawh te, sorkar motor/bungrua tih ral chungchangah ‘public auction’neia tih ral te, sorkar motor hmanna ennawn te, driver chuang 213 zet awmte hi hman tangkai emaw an chungchang chinfel te, pawn lama training ngai chungchangah a ‘trainer’ zawk Mizorama ko chhuah dan ngaihtuah te leh sum tam zawk lakluh anih theihna tura rawtnate an sawiho a ni.

Meeting-ah hian sorkar hotulu Ministers, Speaker, Dy Speaker, Parliamentary Secretaries leh MLA te an tel kim hle a, Chief Secretary pawh a tel a ni.