National Rural Health Mission hnuaia State Health Mission chuan vawiin chawhnu dar 1:30 khan CM Conference Hall ah Chairman Pu Lal Thanhawla Chief Minister hovin Meeting vawi 4-na an  an nei a, ni 12 June, 2009-a Meeting vawi 3-naa District Hospital leh Aizawl Civil Hospital te tihchangtlunna tura thurel tawh chungchang te thlirletin bawhzui chhoh zel dan turte an sawiho.

Vawiin Meeting ah hian Mizoram-a Medical College din chungchangte, Cancer Hospital khum 100 awmna din chungchangte, damlo tawt lutuk leh mihring pung zel avanga Aizawl Civil Hospital-a department thenkhat Referral Hospital, Falkawn-a sawn chungchangte leh Falkawn Hospital tihchangtlun zel dan turte an ngaihtuah hova, heng hi a thuphunga pawmin department kaihhnawih ten a tul angin lo bawhzui se an ti. Aizawl Civil Hospital leh Falkawn Referral Hospital te chu a dinhmunte hriatchian nan Committee Member ten a hmun ngei tlawh an rel a, kar leh ni 23 August, 2010 (Thawhtanni) khian programme an duang nghal bawk.

Meeting chuan Aizawl Civil Hospital leh Champhai Hospital tihchangtlun hna thawk tura rawih mek AEGIS te chu an hnathawh a chak tawk lova hriain sorkar nena inrawihna chu ennawn ni se an ti a, Lawngtlai Hospital dinhmun chhe tak pawh sawi lan niin siamtha turin a rang lama bawhzui ni se an ti bawk. Chief Minister chuan department thenkhatin Open Tender ti lova thil an ti thin chu dan kalh leh buaina thlentu a ni tiin bungrua hlui a thar anga lei a nih thin avanga bungrua chhia kan ngah thu te a sawi lang a, sorkarin chutiang chu tihbo vek tumin engkim langtlang taka hmalak a nih zel tur thu a puang bawk a ni.

Meeting ah hian Health Minister Pu Lalrinliana Sailo leh PHE Minister Pu S.Hiato te an tel a, Meeting hmasa thurel angin Political Party tin aiawh MLA te - Pu B.Lalthlengliana, Pu K.Liantlinga, Pu Lalthansanga leh Pu John Siamkunga te pawh an kal a, Chief Secretary Pu Vanhela Pachuau leh Principal Secretary Pu C.Lalsawta bakah senior officials, Health Department hotute leh tlawmngai pawl aiawhte an kal a ni.