1060/2024-2025

Dated Aizawl, the 4th July, 2024: Vawiin khan Chief Minister Pu Lalduhoma hovin Minister, Assam Rifle hotute leh mizoram sawrkar mi pawimawh ten Zokhawsanga Assam Rifle sawn chungchang thil pawimawh te an sawiho.

Thuhma sawiin Chief Minister chuan, sawrkarna kan lak hnuah Assam Rifle sawn chhuah chungchang hi engmah kan la sawi chuak lova, central sawrkar rilru dik tak hriat kan duh avangin kan ngaichang a ni. Thla hmasa ni 20 a Union Home Minister Pu Amit Shah ka kawm tumin amah zawkin a sawi chhuak a. "Aizawl khawpui laili atanga Zokhawsanga AR sawn chhuah hi thutlukna siam fel tawhsa a ni a, kan sawn ngei dawn a, hmalak tawh chin te enin August thlaa rawn zin ka tum a ni" tiin. Chuvangin hmalak tawh chin te leh hmabak awm te rang taka kan umzui a ngai a, Joint Meeting hi kan buatsaih ta a ni, a ti.

Mizoram Home Department lamin a tir atanga vawiin thlenga hma an lo lak tawh chin te chipchiar takin an sawifiah a, chumi hnuah department dangten an hmalakna pawimawh zual te an sawifiah ve bawk. Assam Rifle lam te hian loneitute tana an ram paltlangna kawng thar laih vang hian an Magazine Building leh Firing Point hmun te sawn a ngaih phah tur thu an tarlang a, internal road, water supply leh electric transformer chhe chungchang te pawh an sawi lang.

Meeting hian, loneitute kawng thar vanga an hmunhma thenkhat sawn ngai te bawhzuiin Joint Inspection rang taka neih ni se, an ti a. An tan kawng thar peih anih hma chu loneitute hi Security Pass siamsak ni se an ti bawk. Zokhawsang internal road leh electric transformer te hi kum 5 kal taa AR hnena hlan tawh an nih avangin a chhe siam hi an kut a ni tawh a. Siam tha tura a bawhzui dan kawng sawipui an ni. Tui supply erawh chu Cyclone Remal lo thlen atanga vawiin thlenga tui supply lama Aizawl khawpuiin harsatna a tawh vang a nih thu tarlan a ni.

Joint Meeting ah hian Pu K. Sapdanga, Home Minister, Pu Vanlalhlana, PWD Minister, Pu F. Rodingliana, P&E Minister leh Prof. Lalnilawma, PHE Minister te, Major General Suresh Kumar Bhambhu, Sena Medal, Inspector General Assam Rifles (East), Pu Vanlaldina Fanai, Commissioner & Secretary to Chief Minister leh Mizoram sawrkar Home, PWD, PHE leh P&E officials te an tel a ni.