No.4053/2020-2021

Aizawl the 12th August, 2020: Vawiin khan COVID-19 hrileng laka Mizoram mipui an himna tur atana hmalak zel dan tur Chief Minister Pu Zoramthanga hovin CM Conference Hall-ah sawiho a ni. Sawrkar inkaihhruaina dinglai angin mitthi vui inkhawmah mi 50 aia tam kalkhawm loh a, social distancing tha taka kalpui anih theih nan kohhran hall ah emaw, YMA hall ah emaw hall dang remchangah mitthi vuina neih thin nise tia rel a ni.

Chief Minister chuan kan him tlan zawk nan mipui kan zavaiin fimkhur nachang kan hriat thar a pawimawh a ni, tiin nasa taka he hrik hi taidarh hluai thei kan ni tih hre reng chungin fimkhur takin kan awm tlan a tul a, fimkhur kan hmasak chuan kan vaia kan himna tur a ni, a ti. Chief Minister chuan testing ngawrh leh zawka tih zui zel pawimawh a tih thu sawiin, Rapid Antigen Test kits lei belh a nih tur thu a sawi bawk.

Vawiin meeting ah hian chhiat ni that ni (mitthi vui, inneih, lungphun leh punkhawmna thil dangah) social distancing khauh taka kalpui a, sawrkarin inkaihhruaina a siam ang zelin hma kan lak a tul thu a sawi a. Mi tam tak an pungkhawm thin chu veiawm an tih thu sawiin, kalkhawm zingah positive pakhat lo awm ta se, contact tracing tih zui a harsat theih tur thu te ngaihthlak a ni a. Hemi chungchangah hian mi 50 aia tamlo kal khawm tur tih chu khauh taka kalpui nise tiin, mitthi vui programme te chu Kohhran hall-ah emaw, YMA hall ah emaw hall dang remchangah, social distancing kalpui theihna tura ruahman mai nise tiin, kalkhawmte an hming, veng leh biakpawhna tur phone number an ziahna tur register chhawpchhuah vek nise tia rel a ni bawk.

Pungkhawm an tlem zawk theih nan association emaw, eng pawl emaw an member thi an lo awm a nih pawhin pawl emaw hnathawhpuite aiawhin mi pahnih aia tam lo intirh ni sela tia rel a ni a. Chhungkhat lainaah pawh a tlem thei ang ber an kal tur a ni, tih a ni a. Zaikhawm hi COVID-19 hrik thehdarhna remchang tak a nih avangin mitthi vuinaah zai loh nise tiin, kalkhawm tur zawng zawngte tha taka an hmai tuam tura tih an ni bawk.

Vawiin meeting-ah hian state pawn atanga lo lut te uluk leh zuala testing an tih dan te, Assam leh Tripura atanga lo lut tur te chu a negative chauh State chhunga an lo luh phal a nih thu te, frontline worker te an him zawk nan a fimkhur lehzuala SOP siam chungchang te sawi a ni a. Community spread a awm thulh a inenkawlna hmun tur indaihlohna awm thei chungchang sawi ni bawkin, kohhran hruaitute hmunhma a tul chuan hman a ngaih thu te sawi a ni bawk.

Meeting-ah hian Health & Family Welfare Minister Dr. R. Lalthangliana, Chief Secretary, H&FW Secretary, DM&R Secretary, IGP (Law and Order), DC Aizawl leh Health Department, Home Department leh DM&R Department officer te, IMA, MKHC, CYMA, MUP leh MHIP aiawhte an kalkhawm a ni.