No.1228/2021-2022 

Aizawl the 2nd July, 2021: COVID-19 second wave hrileng mek laka mipui an him theihna tura hmalak zel dan tur chungchangah vawiin khan Chief Minister Pu Zoramthanga hovin Assembly Annexe Conference Hall-ah inrawnkhawmna neih a ni. Hei hi June ni 24, 2021-a all political party, all NGO leh MKHC joint meeting resolution bawhzuina a ni a.

Meeting kaihruaitu Chief Minister Pu Zoramthanga chuan COVID-19 hrileng do turin khawvelin theihtawp a chhuah a, Mizoramah pawh theihtawpin kan frontline worker te thawkin, NGO-te, political party, mipui leh Task Force hrang hrang ten theihtawp an chhuah tlang thin a ni tiin, an chungah lawmthu a sawi a. Hmalaknaah fellohna leh famkimlohna pawh a awm tih a hriat thu leh, chumiah chuan kalkhawmten an rawtna thawhkhawm a, rah tha tak a chhuah a beisei thu sawiin Chief Minister chuan kalkhawmte chu an ngaihdan te thawh turin a sawm a. INC party, ZPM party, PC party, BJP, ZMP, NPP, MKHC, Joint NGO, Aizawl City Local Council Association, All Mizoram Village Council Association, Non-Govt. Hospitals Association, India Medical Association: Mizoram Branch, MUP, MHIP, MZP leh MZU aiawhte leh AMC aiawh Mayor Lalrinenga Sailo hnen atang tein thusawi ngaihthlak a. Speaker Pu Lalrinliana Sailo pawhin sawrkar hmalakna mipuiin an tawiawm that avanga lawmthu sawiin, Mizoramin covid a do dan kawng hrang hrang hi entawntlak nia a hriat thu a sawi.

Health & Family Welfare Minister Dr. R. Lalthangliana hnen atanga COVID-19 hmachhawn tura nikum atanga state inpuahchah dan leh hmalakna hrang hrang te, vawiin thlenga dinhmun report a pek ngaihthlak a ni a. July ni 1, 2021 thleng khan vaccine dose 5,75,780 lo thleng tawhin, full dose la kim tawh mi 56,328 awm tawhin, India state leh UT te nen khaikhin chuan kum 18 chunglam tan first dose pechhuak hnem ber pasarihna (2011 census atanga chhutin 66%) a ni. Mipui ten awlsam zawka COVID-19 test an tih theihnan hmun parukah siam tawh niin, siam belh zel tum a ni a. Kiosk-a in test man hi Rs.200 tih ni mahse, pek tur neilo tan chuan test man hi phut kher a nih loh thu Health Minister chuan a sawi bawk. Covid hri vei enkawlna hmun dinhmun sawiin, Dedicated Covid Hospital (DCH) - ZMC, Falkawn, khum 271 bakah ICU khum 34 awmna bakah Dedicated COVID Health Centre (DCHC) Mizoram hmun hrang hrangah 15 (belhkhawmin khum 152), COVID Care Centre (CCC) Mizoram pumah 55 (khum 1466 awm theihna), Paid CCC, Mizoramah hmun 2, khum 35 awm theihna leh state danga an neih ve loh, Community Covid Care Centre (CCCC) chu Mizoramah 177 lai awmin (khum 3397 awm thei) siam belh tum an awm thu a sawi a. Heng bakah hian Home Isolation kalpui niin, Saitual leh Kolasib district tih lohah chuan district dang zawngah kalpui mek niin, mi 2649 an lo awm tawh a, tunah hian mi 569 an awm mek a ni.

Health Minister chuan Exit Test (hri kai te discharge theih an ni em tih hriat nan a test) hi uluk taka kalpui zel a nih avangin state dangte nen khaikhin chuan Mizoram recovery rate hi a hniam angin a lan thu a sawi a. Heng bakah hian contact tracing ngawrh taka state chhunga kan kalpui hi state dang zingah ti thei meuh tawhlo an awm nual nia a lan thu a sawi bawk. Mithiamte'n Third Wave awm leh tur thu an sawi angin tunah hian inbuatsaih nan ZMC, Falkawnah naupang enkawlna tur bik Paediatrics ICU khum 10, Neonatal ICU khum 25 leh HDU khum 10 ruahman mek a nih thu a sawi bawk.

Ni 30.6.2021 thlenga Sample test leh positive neih dan chu, RT-PCR ah 1,69,531 ah 6,709; TrueNat PCR ah 33,437 ah 1,297, Rapid Antigen Testah 2,85,955 ah 12,485 positive hmuh a ni. ZMC a COVID-19 laboratory hi April ni 2, 2020 khan din niin, April ni 7 khan hman tan a ni a. A tira RTPCR pakhat leh RNA Extractor khawlte chu tichangtlungin, tunah hian RTPCR khawl pali (4) leh RNA Automated Extractor khawl pahnih (2) hmanga belhchhah a ni tawh a. TrueNAT PCR khawl hi Lungleiah hman hmasak ber niin tunah khawl 4 a awm tawh a, district tinah pawh awm tawhin tangkai taka hman a ni a. Private damdawi in leh kohhran enkawl damdawi in engemawzatah Rapid Antigen Test phalna pek a ni tawh bawk.

FCS&CA Minister Pu K. Lalrinliana pawhin COVID-19 hrileng kara mipuiin ei tur an tlakchham lohna tura sawrkarin theihtawp a chhuah thu sawiin, tuna dinhmunah state godown 116 ah buhfai quintal 2,51,136.94 kan nei mek a. FCI godown-ah metric ton 16,485.50 vel awm a nih thu a sawi a, metric ton 2000 chuang relah a lo thlen mek a awm bawk thu a sawi. Ration buhfai lak nan a fingerprint id hman hi India sawrkarin a ngaihpawimawh em avangin kalpui ngei ngei a ngaih thu leh, mipuiin an him zawk nan kut tihfai that a, hand sanitizer hman that a tul thu a sawi a. Signal thatlohna hmuna a khawl hman that theilohnaah leh Aadhar card lama harsatna tawkte tan offline a ration semna tur dilna June ni 30 thleng khan relaxation pek a ni a, chhunzawm zel a ni dawn em tih ngaihchan mek a nih thu a sawi bawk.

DIPR leh RD changtu Minister Pu Lalruatkima chuan awareness leh thu pawimawh mipui hriattur pekchhuah kawnga DIPR hmalakna hrang hrangte a tarlang a. Rural Department hnuaiah ni 100 inhlawhna hi job card holder-te tan first wave ah ni 100 inhlawhna siam sak a nih thu leh, kumin August thla thleng tan Ministry in sum a sanction tawh thu te sawi bawkin, lockdown chhung pawhin ni 10 atanga ni 15 chu inhlawhsa siam theih niin, hei hian harsatna engemawchen awm thei a sutkian sak thu a sawi bawk.

COVID-19 Medical Operation Team Chairman Dr. Z.R Thiamsanga pawhin thu sawiin, tunah tlemin inkhuahkhirhna thlah dul hret  anih hian mipui te fimkhur leh zuala, COVID Appropriate Behaviour zawm that a pawimawh thu a sawi a. Kan him tlan a, mahni mai bakah kan bul a mite kan venhim theihna tha ber pakhat chu vaccine lak a ni, tiin a tam thei ang bera mipuiin vaccine kan lak a pawimawh thu a sawi. First wave aiin second wave hi a natna hri a thawh chak zawk avangin a khaikhin a rem veklohna chin a awm thu sawi bawkin, hri hmuhchhuah ran leh inenkawl hma a pawimawh thu sawi bawkin, test duhlo kan awmloh nan inhrilhhriatna tha neih zui zel a pawimawh thu a sawi bawk.

Chief Secretary Pu Lalnunmawia Chuaungo chuan India sawrkarin covid natna chu 'disaster' tia a notify angin  mipui him theihna tur chu ngai pawimawh ber chungin hun tawn ang zela ruahmanna siam thin a nih thu a sawi a. Chief Minister's Relief Fund for COVID-19 chungchangah CM Relief Fund awm sa, mi harsa zawkte puihna tura tih nilo, COVID fund anga hman chu pawisa luh dan leh langtlang takin a hman dan pawh tarchhuah thin niin, a hmanna tur ngaihtuahtu pawh committee hran din a, kohhran leh tlawmngai pawlte atanga aiawhtu an awm tel thu a sawi bawk.  

NHM Project Director Dr. Eric Zomawia,  Covid19 Official Spokesperson Dr. Pachuau Lalmalsawma te pawhin hmalakna hrang hrang te sawi zauna hun an nei a ni.

Vawiin inrawnkhawmna hunah hian Home Minister Pu Lalchamliana tel bawkin, Additional Chief Secretary Pu JC Ramthanga, Finance Commissioner te, Health Department, Disaster Management and Rehabilitation Department leh Information & Public Relations Department hotute leh Aizawl DC te an tel bawk.