Aizawl khawpuiin eirawngbawlna gas ah harsatna a tawh mek chungchangah vawiin khan Chief Minister Pu Lal Thanhawla hovin a office cabinet room-ah sawihona neih a ni a, harsatna sutkian lailawk theih dan tur tha a an hriatte an sawiho nghal a ni.

Sawihonaah hian Chief Minister Pu Lal Thanhawla chuan gas indaih lohna hi khawvela harsatna thleng a ni a, sorkar chuan Ministry-ah cylinder ti tam tura a nawr thin thu leh mipuiah harsatna a thlenin sorkar chuan a sutkian dan a zawng tur a ni a ti a. Gas cylinder rawn thleng ang angte hi a nih dan tura semin, hmang ni ila hetiang khawp hian harsatna kan neih a rinawm loh a ni a ti.

Sawihonaah hian memberte chuan gas sem danah hian a manual leh guidelines anga khauh taka kalpui an duhthu an sawi a. Heti khawpa gas a harsatna mipuiin an tawh laia, dan kalha ‘black’a lei tur a awm thin hi a semna lamah thil fello a awm ngeia an rin thu leh chhungkaw khata connection card tam tak nei an awm hi ngaihmawhawm an tih thu an sawi a. Gas harsatna hi Aizawl pawn lamah chuan a awm loh thu sawilangin, tuna Aizawl khawpuia harsatna awm hi sutkian lailawk anih theih nan reserve quota (emergency reserve) Supply department a dil thin hi consumer card nen dil tawhin, card a ziahlan, gas lak hnuhnun ber ni atanga ni 15 tal a karah a tla tur a ni tih te, commercial gas cylinder hmang tura tih, hotel leh restaurant te chu surprise check neih thin ni tawh se, July ni 1 atangin refill booking ti tanin leh distributor/ agent te pawh a tul dan ang zelin Magistrate leh IOC hotute nen surprise check neih thin nise an ti bawk a ni.

Sawihonaah hian Chief Minister bakah Pu H.Rohluna, Supply Minister, Pu Lalrinmawia Ralte, Parliamentary Secretary, Pu John Siamkunga, MLA, Supply Department hotute leh Mizoram Consumers’ Union hotute leh MPCC Media Cell atang te in an tel a ni.