Mizorama Helicopter Service neih turah, a hawnna inaugural flight neih tur chungchang vawiin khan Chief Minister Pu Lal Thanhawla hovin Legislative Assemblya a office room-ah committee member ten sawihona an nei.

Committee chuan helicopter service hawnna inaugural flight hi tun thla August ni 14 chawhma dar 10 ah Thuampui Helipad ah hawnna inkhawm tawi buatsaih a, chuta tang chuan Lungleiah a thlawk ang a. Lunglei Kawmzawl Helipad-ah hian a hmuahna inkhawm tawi lo buatsaih bawkin, chuta tang chuan Aizawl Thuampui helipad ah alo kir leh ang a; a thlawh hnihna atan Thuampui helipad atang bawk hian Champhaiah thlawk lehin, Aizawlah lokir leh tura ruahman a ni.

Helicopter Service hi Pawan Hans Helicopter Ltd enkawlna hnuaia kalpui tur a ni a. Helicopter service tur hi ‘Dauphin Helicopter’, mi 6 chuanna tur chi a ni. A chuan man hi Meghalaya a an kalpui ang zulzuiin minute 1 ah Rs. 50 a ni ang. Tunah hian a thlawhna tur kalkawng (route) 9 ruahmanin, Aizawl Thuampui Helipad chu a hmunpui ber tur, “Main Operational Hub’ ani ang. Heta tang hian Saiha (50 minutes), Lawngtlai (50), Champhai (25), Khawzawl (20), Lunglei (30), Kamlanagar (45), Hnahthial (30), Serchhip (17) leh Kolasib (15) ah te service thin tura ruahman a ni.

Kar khatah ni 6, Pathianni (sunday) tiam lova service thei tura tih, Helicopter service hi ni 16 August 2012 atangin mipuite chhawr theih tura ruahman a ni a. Ticket hi DC office ah lei theih a ni ang a, helipad ah lo endik leh thin a ni ang.Himna (Safety) lam ngaih pawimawh ber anih avangin, helipad tinah security duty leh Fire Service inring reng tura tih an ni a. Deputy Commissioners te chu a tul apianga hman atan helipad bulhnai ah inte, ‘temporary waiting shed’ buatsaih tura hriattir an ni bawk a ni.

Helicopter hi mahni puala hire emaw chartered theih tura ruahmanna siam a ni a, darkar 1 thlawh manah Rs.70,000/- a ni ang a, minute 45 chhung a thlawnin a nghak thei ang a, chumi piah lamah chuan minute 30 dan zelah innghah man Rs.10,000/- chawi a ngai tawh thung ang.

Committee ah hian Chief Secretary Pu Van Hela Pachuau, GAD Principal Secretary Pi Renu Sharma, Civil Aviation Principal Consultant,Wing Comdr (Rtd) Lalzawma te bakah member dang an tel bawk a ni.