Chief Minister Pu Zoramthanga chuan vawiin khan Hnahthial District Headquarters-a DC office leh sawrkar office dangte awmna tur hmun hma a enfiah. Health Minister Dr. R. Lalthangliana, Hnahthial Bialtu MLA bakah Lunglei High Powered Committee Vice Chairman Pu Lawmawma Tochhawng leh Pu T.C. Pachhunga, Sports and Tourism Board Vice Chairman ten Chief Minister hi an tawiawm a ni.

Hnahthial DC buatsaih vantlang inkhawmah Pu Zoramthanga chuan district inrelbawlna changtlung zawk din a nih theih nan DC office leh sawrkar department dang office awmna tur ruahman a, hmasawnna ruangam siampui tura lo kal an nih thu a sawi a. Mizoram sawrkar hmalakna hrang hrang sawiin Chief Minister chuan  kawng siam hna thawh mek a nih thu te, zirtirtu thahnem tak hun reilote chhunga lak an nih thu te, chhung tin damlo inenkawlna kum khatah cheng nuai hnih chin sawrkarin a pek sak theihna tur health care scheme siam a nih thu te leh Mizoram sawrkar flagship programme SEDP-ah board hrang hrang din fel a nih thu a sawi a. Ei leh bara intodelhna tur leh chhungkaw tin sum lakluh a lo pun theih nan SEDP kaltlanga hmalak a nih tur thu leh a hlawhtlinna tur chuan Zoramin malsawmna a dawn, a chhunga chengte chawm zo thei ram zau tak, engkim that duhna hmun, ruahtui tamna kan neih hi hman tangkai thiam a pawimawh a ni, a ti. Chief Minister chuan malsawmna min petu Pathian leh ram tana an theihna hmang turin mipui a sawm a. Hnahthial District chu District tha leh entawntlaka a lo chhuah ngei theih nan theihtawpa sawrkar thawhpui turin district mipuite a sawm a ni.

Health Minister Dr. R. Lalthangliana chuan district thar atan District Master Plan duan a nih tawh thu sawiin hmasawnna tam tak a awm chho zel dawn, a ti a. Inkalpawhna kawng tha zawk buatsaih tura hmalak mek a nih thu te, JNV school leh Ayush Hospital neih theih beisei a nih thu te, district thar pathumah hospital changtlung tak, thawktu tam zawk leh khawl tha te awm tura ruahman a nih thu a sawi. Hnahthial district vanneihna tak, luia hausakna a neih hman tangkai a nih tur thu Minister hian a sawi a. Hnahthial District ah Power supply mamawhna a san avangin an mamawhna phuhru turin hmalak mek a nih thu a sawi bawk.

Vawiin inkhawm hi Hnahthial DC Pu Vanlalmawia'n kaihruaiin, Pu C. Pakunga, Hnahthial District Demand Committee Ex-chairman hnen atangin Hnahthial District pian theihnana hma an lak dan ngaihthlak a ni a. Hnahthial Town VC Association ten CM Relief Fund a chhunluh turin cheng sing khat Chief Minister hnenah hlanin, MLA Relief Fund atan Health Minister hnenah cheng sing khat an hlan bawk.

Chief Minister hian Hnahthial KVK, ITC, BDO, Hospital leh DC office te tlawhin, hmalak belhna tur te a enpui a. Lunglei High Powered Committee member thenkhat te leh Aizawl leh Lunglei atangin PWD, Health Department, Commerce and Industries leh department dang atangin official ten an tawiawm a ni. Chief Minister hian Rawpui ah khawtlang mipui kawmna hun a hmang bawk a ni.