Vawiin khan Aizawl tiamin Mizoram pum hmun 40 laiah Kuthnathawktute Ni hman a ni a. Aizawl ah chuan he Ni hi Chief Minister Pu Lal Thanhawla hovin Lal Thanhawla Auditorium ah hman a ni a, He programme ah hian Sawrkar hotulu, Sawkar officer leh kuthnathawktu te an tel a ni.

Chief Minister Pu Lal Thanhawla chuan mahni kutah hnathawh a eizawn hi hna ropui, zahawm leh pawimawh anih angin anni puala Ni kan nei hi thil lawmawm tak a ni a, hei hian Sawrkarin kuthnathawktute a ngaihpawimawh zia a tilang a ni, a ti a. Kuthnathawktute hmasawnna leh eizawnna kawnga heng miten lei rem an rah a khaw eng an hmuh theihna tur programme Sawrkar flagship programme - NLUP in kum 7 hmel a hmu ta chu thil ropui a ni a, Pathian malsawmna leh duhsakna changin hlawhtlinna te kan hmu chho mek a, hei hian NLUP ah Pathian Nung kut a lang a ni tih a ti chiang hle a ni, a ti.

Kum 20 chhung rambuai avangin eizawnna kawnga mipuite rahbi a tleu a, mipui ten eizawnna ngialnghet an neih theih nan hun hmasa lamah NLUP hi duang chhuakin cheng 30,000 hmangin an rahbi tur tuksak a ni a, kha tih lai huna inchung rangva nei lote tan inchung tur rangva te sem a ni, a ti a. Mi tam takin hlawhtlinna te hmuin an dinhmun te an siamthain, eizawnna ngialnghet an nei nia a hriat thu a sawi a. Hun kal zelah sumhlutna te ngaihtuahin NLUP bultanna tur chu cheng nuai 1 ah tihsan a ni tiin tun NLUP hun hman mekah pawh hian mi tam takin hlawhtlinna an hmu chho mek a, hlawhtling turin rinawmna, taimakna, takna, dikna leh Pathian tihna nen thawh leh hmalak a pawimawh thu a sawi lang bawk.

Tun NLUP hman mek ah hian a tirah cheng vaibelchhe 1500 dil a ni a, mahse Pathianin Ringlo mite kaltlangin Mizo mipuite Ringtu te chawisan a duh avangin kan tan hna a thawk a, kan dil aia tam cheng vaibelchhe 2813 ruahman a ni ta. Kum heti zat mipui leh ram tana rawng ka bawlna kawngah dil aia tam kan hmuh vawikhatna a ni nghe nghe a, Sawrkar Laipuiah hian dil aia tam pek hi ka hre mang lo, a ni, a ti. Hemi ringawt ah NLUP pawh hian Pathian Nung thil tihtheihna leh a Kut a lang chiang hle a, chumi hriatna nung nen a dawngtu te hi kan thawh a pawimawh takzet a ni, a ti.

NLUP hlawhtlin chhoh zel nan Line Department leh a thawktu te pawimawh dante sawiin Line Department leh a thawktu mai bakah Sawrkar hnathawk te hian NLUP hi in phurphuiin nasa takin hma la in theihtawp in chhuah a, lawmthu ka sawi a, a chhunzawmna tur Sawrkar programme thar NEDP ah pawh hetianga theihtawp chhuaha thahnemngai taka tun aia nasa leh zawka tan la turin ka ngenin ka chah duh che u ni, a ti. NEDP hi NLUP chhunzawmna tur a nih angin chhawmdawl ngai la awm te, hlawhtling vak lo te, vanduaina avanga rahbi tleu laklawh te chhawmdawl an ni dawn a, hei bakah hian ei tawk tawk dinhmun atangin hlawk zawka tharchhuak dinhmun a mi hlangkai thei tura ruahmanna a ni a, thalai te thiamna tihpun nan skill development leh entrepreneurship te pawh NEDP hian a huam dawn a ni, a ti bawk. Kuthnathawktu te tana tangkai tur leh an chhawr tur Link Road te, Thlai leh thei vawn thatna(cold storage), a sawngbawlna(processing) leh a man tihpun nana sawngbawlna(value addition) te hi NEDP ah hian ngaihpawimawh a nih tur thu a sawi bawk.

He huna Sawrkar hnathawk kalkhawmte chu mahni aia ram leh mipui dah hmasa tura chahin hetiang kan tih theuh chuan ramin chak leh zawkin hma kan sawn ang a, mitin hlim tlang takin kan awm thei dawn a ni tiin a fuih a. Sawrkar hnathawkte chu mipui zirtirna kawnga hmanraw pawimawh ber an nih thu a sawi bawk.

Hun hmanpuitu dang Home Minister leh NLUP Nodal Minister ni bawk Pu R. Lalzirliana chuan State sawrkar flagship programme hrinchhuah Kuthnathawktute Ni ah hian kum 6 kaltaa NLUP in hmasawnna kawngah a thawhhlawkna ngaihtuahin, a hrinchhuah hlawhtlinna te hi a lungawi thlak hle nia a hmuh thu a sawi a. Heng hlawhtlinnah hian kuthnathawktute thawhrimna bakah sawrkar hnathawkte kawng kawhhmuhna a lang tiin sawrkar hnathawkte chungah lawmthu a sawi a, thahnemngai takin mipui leh ram tan thawk chhunzawm turin a fuih bawk. NLUP chuan harsatna te tawkin chung harsatna te chu malsawnnaah a chan tir a, chu chu University of Minnesota leh UN te nen kan thawhhona te langin rah duhawm tak tak a rawn lang chho mek a ni, a ti a. Tunah chuan kan beisei phak loh thil tam tak chu kan ban phak ah a awm tawh a, mahni thawhchhuaha Zoram thar siam turin ka duhsakna Kuthnathawhtute hi ka hlan duh che u a ni,a ti a. NLUP hlawhtlinna thenkhat chanchin hi a thusawiah Home Minister hian a tarlang bawk a ni.

Vawiina Kuthnathawktute Ni lawmnaah hian Chief Secretary Pu Lalmalsawma chuan lawmna thu sawiin Rev. Dr. K. Lallawmzuala, Associate Professor, ATC in hunserh a hmang a. Pu P.L. Thanga, Vice Chairman, NIB in NLUP hmanga tun thlenga hmasawnna a thlen dan te sawiin a hnen atangin report ngaihthlak a ni a. Dr. C. Vanlalramsanga, Secretary, Planning & Programme Implementation Department hnen atangin NEDP hmanga hmasawnna hna thawh tum dan report ngaihthlak a ni bawk. Anni bakah hian Pu Dalkhena, Non-Official Member, NLUP Implementing Board; Pu Zion Lalremruata, General Secretary, AMFU leh NLUP beneficiary hlawtling Biate khua a mi Pu R. Lalrualliana te pawhin thusawina an nei bawk.

Kuthnathawktute Ni hmanna kimchang hi naktuk zana chhuah tur ‘Hmasawnna Lamtluang’ ah tihchhuah beisei a ni.