Vawiin khan Chief Minister Pu Lal Thanhawla, Chief Secretary Pu Lalmalsawma leh Department thenkhat Secretary te chuan Lengpui Airport enkawlna chungchang te, thlawhnaa  zin veivak pung chho mek leh airlines thar lo lut tur dawl thei tura mamawh leh thil tul hrang hrangte sawiin Chief Minister Office-a Cabinet Room ah meeting an nei.

Meeting ah hian Lengpui thlawhna tumhmun enkawlna chungchang sawiho a nih hnuin tun dihmunah Mizoram Sawrkar kutah awm chhunzawm se tih rel a ni a. Airport chhunga boruak tih dai dan te, Terminal building cheithat chungchang te,  zana tlawhna tum theihna tur night landing chungchang te leh runway kaihhnawih thil te, Airport enkawlna atana GAD Aviation Wing a thawktu mamawh belh chungchangte pawh meeting ah hian sawiho a ni.

Lengpui Airport hi December ni 12, 1998 khan commissioned a ni a, a design hian zin veivak lut leh chhuak 300 ve ve dawl tura ruahman a ni a. Tunlai hian nitin zing vei vak mi 900 (lut leh chhuak) velin Airport hi an hmang mek a. Air India, Jet Airways leh Indigo Airlines thlawhna ten zin veivak te an phur mekin hna an thawk a. Indigo Airlines bakah Regional Connectivity Scheme (RCS) hnuaiah Zoom Air, Deccan Charters leh IIC Technologies Ltd. ten flight operations tan tumin hma an la mek a ni.