Vawiin chawhnu khan Chief Minister Pu Lal Thanhawla kaihhruaiin Chief Minister's Office Cabinet Room-ah MIMER chungchanga thu pawimawh hrang hrang sawiho a ni. Health Minister Pu Lal Thanzara; Advisor to CM Pu RL Rinawma; Commissioner and Secretary for Health Dept. Pu Lalrinliana Fanai bakah Health & Family Welfare Department hotulu dangte, MIMER leh P&E Department hotute an tel a ni.

Chief Minister chuan MIMER tihlawhtling tura Health Department bakah a kaihhnawih Department hrang hrang te leh a bika thawktu tura ruatte hmalakna len thawhhona that avanga thui tak kan thleng tawh a ni, a ti a. MCI chu an duh ulukin, an aiawhten sawi lawk lo a enfiah tura a an rawn inlan thut thin a, bawhzui tur te bawhzui zelin Ministry lam atanga lehkha pawimawh hmuh tur angte pawh hmuh a nih hlawm tawh a nih avangin tun  dinhmun ding theia kan awm hi a lawmawm lawmawm a ti. Chutihrual chuan MIMER chu medical college tha leh changtlung taka siam tum a nih avangin hmabak la awm ang angte chu chak leh uluk taka bawhzui tul a tih thu a sawi a. Faculty quarter luahtute nitin mamawh ang chi te pe a, khawl leh hospital hmanraw hrang hrangte chu a hmangtu turte duh ang ngei chah a, bungrua te pawh chu Inventory uluk tak siama chhinchhiaha bakah tha taka update thin a tul thu a sawi bawk. Chief Minister chuan tha thlah miah lova tran mar pat a ngaih thu sawiin, "bultan thar tur kan ni a, a tan tute phur nan hma kan lak loh chuan hlawhchham theihna kawng kan hawng zau palh thei a ni," a ti. Hetih lai hian MIMER Director chu DDO thuneihna pek ni a, inrelbawlna tha zawk a awm theih nana zau zawka thuneihna pek a ni tel ta bawk chu lawmawm a tih thu a sawi a. Vawiin meeting chuan inpeihlohna lai te bawhzui thuai a nih nan ngaihtuahna seng turin kalkhawmte a sawm a ni.

Vawiin meeting-ah hian thawktu indaihlohna tlem la awmte, hospital leh thawktu chenna quarter leh hostel a kawlphetha pek chungchang te, hostel leh staff quarter siamthat leh furniture lei chungchang te, security, admission leh fee chungchang bakah First Renewal Inspection, kumin kum tawp a hmachhawn tura beisei atana inpuahchahna kaihhnawih thilte sawiho a ni.

MIMER ah hian seat 100 kum khatah zirlai thar tan awm tura  ruahman niin, hetatang hiam State chuan 70% changin, Central leh NRI zirlai te tan 15% ve ve dah a ni a. NRI quota hi hnawhkhat zo NRI atanga an awmloh chuan State kutah a dah theih a ni. Admission hi NEET exam kaltlanga tih tur niin, Higher & Technical Education Department chuan Mizoram Quota zirlaite tan Online Counseling a buatsaih dawn bawk. MIMER a lut turte fee chawi zat tur chu Rs. 80,550 niin, Hostel fee (Rs.17,700) nen chuan a vaiin Rs.98,250 a ni.