1330/2023-2025
Dated Aizawl, the 1st August, 2023: Vawiin khan Chief Minister Pu Zoramthanga kaihhruaiin CM Conference Hall-ah 27th Mizoram State Health Care Scheme Governing Body meeting neih a ni a. Asian Development Bank nena tang duna Mizoram Health Care Scheme changtlung zawk kalpui thuai a nih theih nana thil pawimawh te an rel.

Meeting-ah hian Asian Development Bank lamin Mizoram State Health Care Scheme changtlung zawk kalpuina tura phalna an pek tawh; a taka tihlawhtling tura tihtur tlemazawng la awm te sawiho a ni a, ADB lamin duhdan an rawn neih tuna Health Care Scheme kalpui mek dan atanga han thlak hlek hlek ngaite chu vawiin hian thlak rem tih an ni. He thawh dunna hnuaiah hian mi zawng zawng huap (Universal health Coverage) Health Care Scheme changtlung leh bill theih zat sang tak chu Cashless System hmanga kalpui tur a ni.

Hei bakah hian AB PM JAY tun sawrkar kum kal meka beneficiary thun belh ngai la awm te thun belh rem tih a ni a, AB PM JAY hnuai veka sawrkar Hospital te claim revenue pawh sawrkar Hospital thuneitute remtihna angin tih danglam deuh a ni. Mizoram Health Care Scheme hnuaia Computer Engineer te chu an hming Informatics Officer tia thlak a ni bawk. Tun dinhmuna Health Care Scheme bill pek chhuah hmabak chungchang pawh sawi lan niin; heng bill pek hmabak te hi sawrkar sum dinhmun a zira a rang lama pek chhuah zel ni se an ti a ni.

Meeting-ah hian Health & Family Welfare Minister Dr. R. Lalthangliana, Health & Family Welfare Board Vice Chairman, Dr. ZR Thiamsanga, MLA; Dr. Renu Sharma, Chief Secretary leh sawrkar official pawimawh te bakah tlawmngaipawl (non –official members) aiawhte an tel a ni.