Vawiin khan Chief Minister Pu Lal Thanhawla, Environment, Forests & Climate Change Minister ni bawk hovin nungcha, thing leh mau humhalhna atan din Mizoram State Biodiversity Board chu Chief Minister Office ah an thukhawm a. Nungcha chi hrang hrang, thing leh mau, thei leh thlai te humhalhna kawnga hma lak dan tha hrang hrang an hriat te, Board huang tih zauh dan te leh thil pawimawh hrang hrang an sawiho a. Meeting ah hian May ni 22 a International Biodiversity hman dan tur chungchang an sawiho bawk a ni.
Chief Minister Pu Lal Thanhawla chuan thuhma sawiin tunhma ngaihtuahin kan ramah nungcha, thing leh mau ‘biodiversity’ kan tih mai humhalh leh zirchian nachang kan hria hi a lawmawm a, hemi kawngah hian mipui mimir pawhin an mahni zawnah theuh hma an lak theih nan biodiversity humhalh pawimawh zia leh a tul zia hi tun aia nasa leh zawka kan inzirtir a ngai in ka hria a ni, a ti a. Khawvel boruak inthlak danglam chho mekah biodiversity pawimawhna hi a lian zel a, keini ang biodiversity lamah hausa state te tan a pawimawh leh zual a ni, a ti.
Meeting ah hian thlai leh thei hrang hrang Mizorama awm bik, Mizoram in a ta neih theih nan chak taka Geographical Indication (GI) ah hmalak chak a tul thu sawilan niin Hmarcha a GI neih a nih tawh thu leh tunah hian Balhla ah GI buaipui mek a nih thu Horticulture Department Director in a sawi a. Hetiang bawk hian Agriculture (Crop Husbandry) Director Pu J. Lalzamliana pawhin buh leh vaimim thenkhat patent anih tawh thu leh a dang pawh tih mek anih thu a sawi lang a, fimkhur taka kalpui a ngaihthu a sawi bawk.
Meeting ah hian Principal Secretary leh PPCF ni bawk Pu Lalram Thanga chuan state pawn atanga Mizorama nungcha, thing leh mau zirchiang tur mithiam lokal thin te chu Mizoram University leh tual chhung mithiam te thawhpui tura thu tlukna siam pui chu tih ngei ngei atan tih zel tha a tih thu a sawi a. Meeting ah hian ecotourism kaihhnawih thil thenkhat te pawh sawiho niin Fisheries Department aiawh chu Biodiversity Board a sengluh nise tiin rawtna an siam a. Phai atanga mithiam lokal ten nungcha leh thing leh mau sample an hawn ruk loh nan airport a duty te hemi chungchang hi zirtir nise an ti bawk. Biodiversity chungchanga inzirtirna leh inhrilhhriatna chu tun aia nasa leh zawka kalpui dan kawng zawn nise tiin an rel bawk a ni.
Mizoram State Biodiversity Board hi 2005 ah din niin tuna Board awm mek hi Board 5 na a ni. Vawiin meeting ah hian Department hrang hrang aiawh leh University leh College mithiam thenkhat, he Board member te chu an tel kim vek a ni.
Ruahman lawk ang chuan International Biodiversity Day 2017 chu May ni 22 khian Assembly Annexe Building Conference Hall ah hman a ni dawn a, Chief Minister chu he programme hi hmanpui tura beisei a ni.
