Mizoram State Health Care Society (MSHCS) chuan vawiin khan Chief Minister's Office Conference hallah Chairman Pu Lal Thanhawla, Chief Minister hovin Governing Body Meeting vawi-10-na neih a ni a, agenda chhawpchhuah hrang hrang 6 an sawiho.

Chief Minister Pu Lal Thanhawla, MSHSC Chairman ni bawk chuan mipui vantlang hriselna hi ngaihpawimawh a tul thu sawiin, central sorkar pawhin 12th Five Year Planah Social Sector zinga ngaihpawimawh ber pakhatah a dah a ni a ti a. Health Care hi social indicator pawimawh tak a ni a, ram changkangte chuan an ngaipawimawh a, an ngaihpawimawh dan zuk hre pha silovin kan lo inti changkang a, kan changkang silo a ti a. Chuvangin hriselna lamah mipui ten zir tur kan la ngah hle a ni a ti.

Chief Minister chuan ram leh hnam in hlawkna an hmuh hma a lo hlawk hmasak tum kan la awm hi a ninawm hle a ni tiin, sorkar hnathawk lian thenkhat zingah an zin veivahna a sorkar pawisa tham tawk tawk an la awm cheu te hi an tih loh tawp tur a ni a ti. Health Care Society a thawk te chu lo hlawk ruk pui tum an awm loh nan medical bill te chu chik taka enpui thin turin a chah a ni.

MSHCS ah hian ni 29.4.2011 thleng khan Above Poverty Line (APL) damlo mi 3000 tan cheng 3,01,19,107 leh RBSY hnuaia Below Poverty Line (BPL) damlo mi 208 tan Rs. 9,99,800 a pek sak tawh a. Hemi ni thlenga MSHCS a inziaklut mi 5254 atang hian APL damlo mi 1075 tan senso tur Rs. 1,79,78, 901 pawmpui tura kalpui mek a ni bawk a. Hetih lai hian RBSY hnuaiah Rs. 22,96,190 senna turin mi 451 inziaklut an awm tawh bawk a ni. MSHCS ah hian APL inziaklut mi 234 leh RBSY hnuaia inziaklut mi 18 te chu hnawl an ni tawh bawk.

MSHCS ah hian member 16 an awm a, an zingah hian non official member 3 leh sawm bik 3 an tel a ni.