4482/2025-2026

Aizawl the 16th February 2026: Vawiin khan Mizoram Universal Health Care Scheme thuneitu sang Governing Body te chu an chairman Pu Lalduhoma, Chief Minister hovin CM Conference Hall-ah an thukhawm.

Chief Minister hian Health Minister Pi Lalrinpuii leh MUHCS a thawktute chungah lawmthu a sawi a. An thawhrimna leh remhriatna zarah sorkar a hmingtha a, kan scheme chhawrtu mipuite an lawm em em a ni, a ti.

MUHCS ah hian chhungkaw 20,198 mihring 80, 792, pensioner chhungkaw 10,236 mihring 40,944, sorkar hnathawk chhungkaw 35,325 mihring 1,41,300 leh AB PMJAY chhungkaw 2,22,943 mihring 8,91,772 awmna, a vaiin chhungkaw 2,88,702 te, a mihringa mi 11,54,808 te chu an inziaklut a.

Tun kum kal mekah chhungkaw inziaklut zawng zawng atanga chhuta za zela sawmhnih pakua (29 %) ten medical bill an thehlut a, chu chu mihring inziaklut zat atanga chhutin za zela pasarih (7%) an ni. Mi pakhat hnena bill pek zat (approved) hi chawhrualin (Avarage Payout per Patient) Rs. 15,106 a ni.

MUHCS kalpui a nih hnuah hian sorkar damdawiin pantu an pung nasa a. Bill endik tawh za zela sawmsarih (70%) chu sorkar hospital-a lut a ni. Sorkar hospital-a lutte hi tam zawk mahse an bill erawh chu bill pawm tawh zawng zawng atanga zaa sawmthum pakua (39 %) a ni thung a. Private hospital pantute bill a san bik chhan hi natna serious bik, Thluak zai, Thin thlak leh Kal thlak ang chite an nih thin vang a ni tlangpui a. Hei vang hian sorkar hospital te thuam chak zel a tul hle ngaih a ni. Sorkar hospital leh empanelled hospital-a enkawl theih natnate chu a theih chin chinah non - empanelled private hospital-a refer loh ni se, an ti a. Non - empanelled hospital-a enkawl tura refer theihna dan Emergency / Life Threatening Situation pawh a natna kalpui theih chin chiang lehzuala sawifiah a ni ang.

"Sorkar hian empanelled hospital-te hnenah ni 30 chhungin bill a pe chhuak thin ang", tia dan siam a nih laiin sum leh pai dinhmun a that avangin kartin pawisa hi an pe chhuak thin zawk a. Chuvangin, empanelled hospital-te tan harsatna engmah a awm rih lova ngaih a ni.

Tun kum kal mek MUHCS atana fund hmuh tawh zawng zawng hi Rs. 154 Crore vel a ni a, la hmuh tur Rs. 48 Crore vel a la awm a. Damlo bill endik tawh hi 83,682 niin bill pek chhuah tawh zat hi Rs. 126 Crore vel a ni. Bill endik tur Rs. 38 Crore vel a la awm a, endik thuai a ni ang.

MUHCS hi sorkar pawisa kum mila kalpui a ni a, pawisa kum thar atanga chak zawka kalpui a nih theih nan vawiina meeting hian ruahmanna an siam a. Committee tihtlem pawh tha an tih angin Core Committee chu tihbo tawh tur a ni. A kalphung tur dangte pawh siam rem hlek hlek a ni a. Chung zingah chuan damdawi man tlawm taka lei theihna tur Pharma Depot din tura hmalak leh subscription-a double beneficiary awm palh thei laka invenna siam te an tel a ni.

Meeting-ah hian Pi Lalrinpuii, Health Minister, Pu TBC Lalvenchhunga, Adviser to CM leh Governing Body member dangte an tel a ni.