Vawiin khan Chief Minister Pu Lal Thanhawla hovin a Office ah  MULCO leh Champhai, Kolasib leh Lunglei a bawnghnute sawngbawlna Dairy Plant te enkawlna leh heng hmun ten bawnghnute tam zawk an sawngbawl theih dan tur kawng Tata Trusts peng North East Intitiative Development Agency (NEIDA) in an lo ruahman chhin chu sawiho a ni a.

Chief Minister Pu Lal Thanhawla chuan MULCO hmasawn chhoh dan chu lawmawm a tih thusawiin NLUP hnuaiah pawh chu hmasawnna chu kal tluang zelin bawnghnute tharchhuah te a pung a, bawnghnute sawngbawlna ti changtlun turin leh bawnghnute tam zawk sawngbawl thei turin NLUP kaltlangin bawnghnute sawngbawlna khawl thar Indigenous Milk Product Plant te bun a ni a. MULCO hlawhtlinna hi ran vulhtu te bakah mipuiin kan chhawr a ni, a ti a. Tata Trust peng NEIDA in ran vulhna kawng, a bik takin bawng vulh leh vawk vulh te hlawkpui zawka kalpui a nih theih nan hma an rawn la leh Sawrkar an thawhpui hi a lawmawm a ni, a ti.

Meeting ah hian NIB Vice Chairman Pu PL Thanga chuan MULCO thuamthat leh tihchangtlun dan kawng te tarlangin MULCO hotu ten MULCO dinhmun leh harsatna an tawh te an sawi lang a. NEIDA aiawh chuan MULCO thuamthat dan te, tun aia MULCO huam ti zau tura hmalakna awm thei te leh MULCO enkawlna siamthat  dante an sawi langin TATA Trust chuan bawnghnute sawngbawlna project atan cheng vaibelchhe 2.5 hu man project an buaipui mek thu a sawi.

Meeting ah hian MULCO thuamthatna, tihchangtlunna leh siamthatna te chu zau leh chipchhiar taka sawiho anih hnuin MULCO thuamthat hna chu NIB, AH & Vety Department leh Cooperation Department bakah NEIDA nen tan hoa tih nise tih rel a ni a, Champhai, Kolasib leh Lunglei Dairy Plant te chu AH & Vety Department in la enkawl zui se tih a ni a. MULCO enkawlna dan siamthat chungchangah a hnuaia Society leh Member te inhrilhriatna neih nise tih a ni bawk.

Meeting ah hian Home Minister leh NLUP Nodal Minister ni bawk Pu R. Lalzirliana; Finance Minister Pu Lalsawta; AH &Vety Minister Pu Ngunlianchunga; State Planning Board, Vice Chairman Pu H. Liansailova; NIB Chairman Pu JH Rothuama; NIB Vice Chairman Pu PL Thanga, IAS (Retd) bakah NIB hotu dangte leh AH & Vety Department leh Cooperation Department hotulu leh MULCO aiawhte an tel a ni.